Bul týraly Bilim jáne ǵylym mınıstri Asqat Aımaǵambetov «QazAqparatqa» bergen suhbaty barysynda aıtty, dep habarlaıdy Almaty-akshamy.kz
Asqat Aımaǵambetov elimizde talaptarǵa saı kelmeıtin joǵary oqý oryndarynyń jabylýyna qatysty da aıtty.
Bizde «qara tizim» degen joq. Jalpy, «mınıstrlik bir tizimdi jasap, mynalar tizimge kirdi, endi osylar jabylýy kerek» degen túsinik te joq. Sebebi bizde táýekelderdi anyqtaıtyn arnaıy júıe bar. Jyl saıyn osy júıe boıynsha qaı ýnıversıtet sapany bermeı jatqanyn qaraımyz. Bizde ulttyq elektrondy baza bar, sol bazaǵa ár ýnıversıtet ózderiniń derbes kórsetkishterin jazyp beredi. Ony biz jazbaımyz. Biz tek qana sol kórsetkishterdi zerdelep qaraımyz. Osy nátıjelerdi nazarǵa alyp, táýekelder bar ekenin bilgennen keıin, ony arnaıy tekserý úshin tirkeýden ótemiz. «Biz tirkep qoıdyq, kelesi jyly myna ýnıversıtetter tekserýden ótedi» dep aldyn ala jarıalaımyz. Eshkim de tosynnan kelip, tekserý júrgizbeıdi, - dep aǵynan jaryldy vedomstvo basshysy.
Sonymen qatar ol tekserý ótkizetin arnaıy paraq bar ekenin, qaı máselege nazar aýdarylatynyn joǵary oqý oryndary jaqsy biletinin alǵa tartty.
Bul rette prfessorlyq-oqytýshylar quramynyń, oqýlyqtardyń, tıisti kompúterlerdiń, bilim sapasynyń, jataqhananyń bolýy sıaqty talaptarǵa ekpin qoıylady. Bıyldan bastap eń basty talaptyń arasyna balalardyń bilimi sapasyn anyqtaý úshin tıisti testileý ótkizýdi engizdik. Munyń aldynda testileýsiz ár túrli jaı ǵana kórsetkishterden zertteıtin. Sonda ýnıversıtetter «eń bastysy materıaldyq bazaǵa emes, bizdegi bilim sapasyna qarańyzdar» dep aıtatyn. Osyny eskerip, bilim sapasyn engizdik. Tıisti baǵyttar boıynsha balalardyń bilimderin tekseremiz. Biz japqan ýnıversıtetterde ózderi ótip, emtıhan tapsyrǵan pánderden bilimin dáleldeı almaı otyr. Bul jaǵdaı - biz úshin óte úlken sıgnal, - dedi elimizdiń bas ustazy.
Sondyqtan osyndaı ýnıversıtetterdi birinshi ret teksergennen keıin, qandaı kemshilikter bar ekenin aıtyp, ony túzetýge ýaqyt beriledi dep otyr.
Aldyn ala eskertip, ekinshi tekserýge baramyz. Úshinshi tekserýge deıin taǵy ýaqyt beremiz. Odan soń tıisti sheshim aıasynda lısenzıasynan aıyryp, sotqa júginip, shara qoldanylady. Osy baǵytta 41 ýnıversıtetten 500 lısenzıany qaıtaryp aldyq, ıaǵnı olar tıisti bilim berý sapasyn qamtamasyz ete almady. Al tolyǵymen bizde 15 ýnıversıtet jabyldy. Osynda oqyǵan 100 myńnan astam stýdent basqa oqý oryndaryna aýysty, - dep atap ótti mınıstr.