Astananyń birqatar ýnıversıtetterinde stýdentterge 5-shi Dúnıejúzilik kóshpendiler oıyndarynyń volonterlik baǵdarlamasy tanystyryldy, dep habarlaıdy almaty-akshamy.kz
Jıyndarda 5-shi Dúnıejúzilik kóshpendiler oıyndaryn daıyndaý jáne ótkizý jónindegi dıreksıa basshylyǵy volonterlerdiń osy oıyndarǵa úles qosýǵa múmkindigi baryn, eriktiler qyzmetiniń tájirıbe jınaýdaǵy mańyzyn jetkizdi. Sonymen qatar volonterlerge qoıylatyn talap, ereje, irikteý kezeńderi týraly málimet jan-jaqty túsindirildi.
Jastardyń eriktiler jasaǵy – sporttyq jáne mádenı sharalardyń mańyzdy bóligi. Meımandy qarsy alý, olarǵa jol kórsetip, baǵyt silteý, sheteldikterge aýdarmashy bolý sıaqty kózge kórinbeıtin istiń bárinde volonter júredi. Bylaısha aıtqanda, erikti degenimiz ózara rıasyz kómek pen patrıotızmniń, qoǵamǵa jáne elge paıdaly adam bolýdyń jarqyn úlgisi. Derek úshin aıtsaq, EXPO-2017 kórmesine 7000-nan astam erikti qatysty. Qysqy Azıa oıyndarynda da jas órenderimiz volonter retinde belsendilik tanytty.
5-shi Dúnıejúzilik kóshpendiler oıyndaryna volonter bolýǵa nıet bildirýshiler saıty arqyly «Erikti bol» bólimine kirip, saýalnamany toltyrýy kerek. Barlyq talaptan súrinbeı ótken úmitker suhbatqa shaqyrylady. Volonter jumysyna 18 jastan asqan úmitker tańdalady.
Qosymsha Instagram, Tik Tok áleýmettik jelilerinde @Volunteer_nomadgameskz paraqshalarynd kórsetilgen. Sondaı-aq WhatsApp, Telegram-da 8 701 841 20 24 baılanys nómiri arqyly suraqtaryńyzdy joldaı alasyzdar.