7-14 shilde aralyǵynda Astana qalasynda bıologıadan IBO-2024 35-shi halyqaralyq olımpıadasy ótedi.
Bul týraly QR Prezıdenti janyndaǵy Ortalyq komýnıkasıalar qyzmetinde ótken brıfıńte Orta bilim komıtetiniń tóraǵasy Qanybek Jumashev aıtty, dep habarlaıdy Almaty-akshamy.kz Oqý-aǵartý mınıstrligine silteme jasap.
Halyqaralyq bıologıa olımpıadasy (IBO) – álem elderiniń orta mektep oqýshylary arasyndaǵy eń bási joǵary báseke jáne bilim salasyndaǵy eń aýqymdy sharalardyń biri. Qazaqstandyq mektep oqýshylary ǵylymı jarysqa 1996 jyldan beri qatysyp keledi. Osy ýaqyt ishinde olar 2 altyn, 20 kúmis, 54 qola medal jáne 14 qurmet gramotasyn jeńip aldy. Bul joǵary kórsetkish bolyp sanalady. Qazaqstannyń mundaı bedeldi is-sharany ótkizý orny retinde tańdalýy da sondyqtan.
Bıylǵy olımpıadaǵa 80 elden 350 oqýshy qatysady dep kútilýde. Dodada 40-tan astam júlde talasqa salynady. Elimizdiń qurama komandasy sapynda tórt oqýshy bar.
«Oqý jylynyń basynan bastap olımpıada tapsyrmalaryn halyqaralyq deńgeıde ázirleý boıynsha aıtarlyqtaı jumystar atqaryldy. Tapsyrmalar bıohımıa, molekýlalyq bıologıa, bıoınformatıka, anatomıa jáne janýarlar fızıologıasy salasyn qamtıdy. Búgingi tańda bıologıadan Qazaqstannyń olımpıadalyq quramasy aldaǵy jarystarǵa qyzý daıyndalyp jatyr, «Daryn» ortalyǵynda oqý-jattyǵý jıyndary ótýde. Olımpıada aıasynda qazaqstandyq pedagogter úshin bıologıadan olımpıada esepterin sheshý boıynsha sheberlik sabaqtary, semınarlar jáne álemniń jetekshi ǵalymdarynyń ǵylymı-tájirıbelik konferensıalary ótedi», - dep atap ótti komıtet tóraǵasy.
Eske salaıyq, ótken jyldyń qarasha aıynda Qazaqstan Respýblıkasynyń Oqý-aǵartý mınıstri Ǵanı Beısembaev pen IBO Halyqaralyq uıymdastyrý komıtetiniń tóraıymy Lenka Lıbýsovanyń kezdesýi ótken bolatyn. Taraptar zıatkerlik saıysty uıymdastyrý máselelerin, sondaı-aq qazaqstandyq bilim berýdi damytý perspektıvalaryn talqylady.
Jalpy, 2023 jyldyń qorytyndysy boıynsha qazaqstandyq oqýshylar halyqaralyq olımpıadalarda 580 medalǵa ıe boldy, onyń ishinde 23 medaldi eń bedeldi jeti álemdik olımpıadada jeńip alǵan: IMO, IPhO, IBO, IOL, IShO, IGeO, IOI. Olarǵa birjolǵy aqshalaı syılyq berildi: altyn medal alǵandarǵa – 1500 AEK, kúmis úshin – 1000 AEK, qola úshin – 500 AEK, sondaı-aq olardy daıyndaǵan pedagogterge bazalyq jalaqynyń 8,5-ten 26,5 eselengen mólsherinde syıaqy tólendi.