Almatyda dárigerler jasy 40-tan asqan er adamdardy nesep-jynys músheleriniń isikterin erte anyqtaý úshin júıeli túrde tekserýden ótýge shaqyrady. Óńirlik komýnıkasıalar qyzmetiniń baspasóz konferensıasynda Almaty onkologıalyq ortalyǵynyń onkolog-ýrology Aıkerim Omarova kóptegen onkologıalyq aýrýlardyń asımptomatıkalyq túrde damyp, tek kesh satysynda ǵana anyqtalatynyn aıtty, dep habarlaıdy aqshamnews.kz.
«Qýyq asty beziniń qaterli isigin der kezinde anyqtaý úshin jyl saıyn qýyq asty beziniń spesıfıkalyq antıgenine test tapsyrý qajet. Onyń joǵarylaýy isik prosesiniń bastalýyn kórsetýi múmkin. Erte dıagnoz sátti emdeý múmkindigin aıtarlyqtaı arttyrady», - dep atap ótti maman.
Nesep-jynys músheleriniń qaterli isigi qaýip faktorlaryna 50 jastan asqan, sozylmaly qabyný prosesteri (pıelonefrıt, prostatıt, sıstıt), jaman ádetter, semizdik, tuqym qýalaıtyn beıimdilik, ýly zattardyń áser etý jaǵdaıynda jumys isteý jatady.
2024 jyly Almatyda 5209 qaterli isik aýrýy tirkeldi. Onyń ishinde 518 jaǵdaı nesep-jynys júıesiniń isikterimen baılanysty boldy. Atap aıtqanda, 218 – qýyq asty beziniń obyry, 189 – búırek jasýshaly isigi, 111 – qýyq isigi.
«Aldyn alý jáne der kezinde medısınalyq tekserýden ótý – densaýlyqty saqtaýdyń kepili. Eger sizde zár shyǵarý, zárińizde qan nemese belińiz aýyrsa, dárigerge barýdy keshiktirmeńiz», - dedi Omarova.