Almatyda qazaqstandyq «Erekshe dáriger» fılmi birer kúnde prokatqa shyǵady. Úlken ekranǵa jol tartatyn ózgeshe týyndy – otandyq kınokeńistikte tanymal akterlarmen birge daýn sındromymen týǵan balalar oınaǵan eń alǵashqy kórkem fılm.
Erekshe týyndyny «Arman» kınoteatrynda tamashaladyq, akterlarmen júzdestik, oı-pikirin tyńdadyq. Kartınada Azız Beıshenalıev, Galına Tabala, Azat Seıitmetov, Alekseı Shemes, Shyńǵys Kapın, Olga Landına, Laýra Erkebulan, Karına Sultan, Orynbasar Tazabekov, Tatána Tarskaıa jáne erekshe balalar – Marta Permınova, Anna Gladchenko, Arlan Ádilman, Damır Sadyqov, Kırıana Stanıshevskaıa oınaıdy.
Múmkindigi shekteýli balalar bul kınotýyndyda múmkin emes nárse joq ekenin dáleldep, ózderin naǵyz akterlyq qyrynan kórsetip, detektıvke qurylǵan oqıǵa jelisin shynaıy oınap shyqqanyn baıqadyq.
...Otstavkadaǵy áskerı maman Aleksandr (rólde Azız Beıshenalıev) kontýzıadan keıin paıda bolǵan adam tózgisiz bas aýrýyna em tappaı, dástúrli medısınadan kúderin úze bastaǵanda, ǵalamtordan «Erekshe dáriger» dep atalatyn jekemenshik klınıkany baıqap qalady. Onda «kez kelgen aýrýdy úıińizge baryp bir seansta-aq emdep jazamyz» degen jarnamany kózi shalady. Telefonmen álgi klınıkanyń dárigerin shaqyrtady. Kútken dárigeri Daýn sındromymen ómirge kelgen Marta esimdi 10 jastaǵy erekshe qyz eken. Ol shynymen de búldirshinniń mańdaıyna aparǵan názik qolynan qýat alyp, shıpa tapqandaı, táýir bolǵandaı sezinedi ózin. Biraq kókeıinde kúmándi kóp saýal paıda bolady. «Bul qandaı klınıka, onyń dárigeri nege bala jáne erekshe balaqaı, arǵy jaǵynda basqa da osy dıagnozdaǵy baldyrǵandar turǵan joq pa, olardyń eńbegin paıdalanyp, aqsha bopsalap júrgender bar shyǵar, bálkim?» degen sekildi suraqtarǵa jaýap izdep, shytyrman oqıǵalarǵa tap bolady.
Iá, ınklúzıvti «Erekshe dárigerdiń» janry – áleýmettik drama elementteri bar mıstıkalyq detektıv. Bas prodúseri – Sofıa Vıtver.
Almaty men Astanada túsirilgen kınotýyndy kórermenin erekshe balalardyń shynaıy ómirine nazar aýdartýdy, olar da osynaý qoǵamnyń bir múshesi ekenine, olardyń da qolynan kóp dúnıe keletinin jetkizýdi maqsat etken. Marta – ómirde de adamdarǵa kómekteskisi kelip turatyn meıirimdi qyz. Al kartınada Vıktor Soıdyń óleńin aıtqan kishkentaı Arlan shyn máninde Soıdyń barlyq týyndysyn jatqa biletin kórinedi.
– Maǵan osy kartınaǵa túsýge usynys túskende, árıne, qýana kelistim. Sebebi, dál osyndaı formatta Ortalyq Azıada osy tektes fılmniń túsirilgeni esimde joq. Kartınaǵa túsken balalar shynaıy oınap shyqty. Olar bizge emes, kerisinshe, olarǵa bizdiń ıkemdelýimizge týra keldi. Óıtkeni, erekshe baldyrǵandarǵa sahnanyń kásibı talaptaryn qoıa almaısyz, olar dál sol sátte ne oılap tur, neni aıtqysy keledi, qalaýy qandaı, sony kórsetti. Iaǵnı balalar úshin arnaıy senarı bolǵan joq, olar ımprovızasıa jasady. Árqaısysy óz rólin sátti alyp shyqty. Al biz olardyń ár tabıǵı sóılegen, shynaıy sátterin kadrlarda utymdy paıdalanýǵa tyrystyq. Shyny kerek, bizdiń mansaptyq jolymyzda bul bir erekshe túsirilim boldy. Daýn sındromymen týǵan balalardyń damýy onyń qorshaǵan ortasyna da kóp baılanysty. Kartınaǵa túsken erekshe balaqaılar bolashaǵynyń jarqyn bolýyna tilekshimin, – deıdi basty róldi somdaǵan akter Azız Beıshenalıev.