Almatydaǵy №2 arnaıy mektep-ınternatynda túlekterdiń bolashaq mamandyǵyn tańdaýǵa kómektesýge arnalǵan «Jarqyn bolashaq baspaldaǵy» atty kezdesý keshi ótti. Bul bilim ordasynda qazirgi tańda 168 erekshe bala oqyp jatsa, olardyń ishinde bıyl 9-synypty aıaqtaıtyndar da bar.
Mektep-ınternatta bilim berý 1-10 synyp aralyǵynda júredi. Oqýshylar 10-synypty qosymsha baǵdar retinde oqıtyndyqtan, túlekter aldynda mańyzdy qadam – mamandyq tańdaý máselesi tur. Osyǵan oraı, mekeme basshylyǵy jyl saıyn qaladaǵy kásiptik jáne tehnıkalyq bilim beretin kolej ókilderimen kezdesý uıymdastyryp, oqýshylarǵa baǵyt-baǵdar berýdi dástúrge aınaldyrǵan.
Bıylǵy kezdesýde kolej ókilderi erekshe balalarǵa arnalǵan jumysshy mamandyqtaryn tanystyryp, beınerolıkter arqyly kásiptik bilimniń artyqshylyqtaryn kórsetti. Kásiptik bilim berý mekemeleriniń kóbi «Jas maman» baǵdarlamasy aıasynda tolyqtaı jańartylǵan. Olardyń materıaldyq-tehnıkalyq bazalary zamanaýı quraldarmen jabdyqtalǵan, oqý sheberhanalary men zerthanalary talapqa saı jasaqtalǵan. Oqýshylarǵa tájirıbeli ustazdar men óndiris mamandary dáris beredi, bul olarǵa sapaly bilim alyp, bolashaqta óz qalaǵan kásibin ıgerýine múmkindik beredi.
Kezdesýge ata-analar da qatysyp, balalarynyń mamandyq tańdaýdaǵy múmkindikteri týraly mamandardan keńes aldy. Mundaı sharalar erekshe balalardyń óz jolyn durys tańdaýyna kómektesip, bolashaqqa degen senimin arttyrady.