Bul - Pavlodardaǵy jaǵdaı.
Pavlodar oblysynyń Aqsý qalasynda erekshe balalarǵa merzimi ótip ketken táttiler taratylǵan, dep habarlaıdy almaty-akshamy.kz
Áleýmettik jelide kásiporyndardyń biri erekshe balalarǵa merzimi ótip ketken táttiler taratqany týraly aqparat tarady.
«Keshe balalarǵa arnalǵan shyrsha boldy. Kóńil kúıimizdiń buzylǵany jáne merzimi ótip ketken táttiler úshin rahmet. Bizdiń balalarymyz erekshe bolǵany úshin olarǵa osyndaı buzylǵan tátti berýge bola ma? Salyp jatqan kezde qaraýǵa bolmady ma?», – deıdi jeli qoldanýshysy.
Aqsý qalasy bilim berý bóliminiń basshysy Qaırat Smaǵulovtyń aıtýynsha, merzimi ótip ketken táttilerdi jabdyqtaýshy jetkizgen.
«Mundaı jaǵdaı birinshi ret bolyp otyr. Olar segiz jyldan beri syılyqtar ákeledi jáne mundaı bolǵan emes. Kámpıtterdiń qatty bolýy men merzimderiniń ótip ketýi ata-analardyń ashýyn týdyrdy», – deıdi Qaırat Smaǵulov.
Bólim basshysy shaǵymdardan keıin táttilerdiń qaptamasynyń syrtynda jańadan jaramdylyq merzimi jabystyrylǵanyn kórgenin aıtady. Budan keıin ata-analarmen Zoom arqyly jınalys ótkizip, olardan keshirim suraǵan.
«Syılyqtardyń jaramdylyq merzimin teksermegenim úshin óz kinámdi moıyndaımyn. Bul – erekshe balalar. Tipti, osylaı bolady dep oılamaǵan edim. Buǵan qosa, syılyqtardy erterek emes, shyrsha merekesi taıap qalǵan kezde jetkizdi», – deıdi Qaırat Smaǵulov.
Aıtýynsha, erekshe balalarǵa arnalǵan mundaı erteńgilikterde jyl saıyn teatrlandyrylǵan qoıylym uıymdastyrylady, syılyqtar beriledi.
«Qala boıynsha barlyǵy 291 erekshe bala bar jáne kásiporyn barlyq erekshe balalarǵa syılyqtar beredi», – deıdi ol.
Bólim basshysy aldaǵy kúnderi syılyqtar aýystyrylatynyn málim etti.