«Joǵary oqý ornynyń úzdik oqytýshysy-2023» baıqaýynyń jeńimpazdarynyń esimderi belgili boldy.
Respýblıkalyq konkýrstyq komısıa oqytýshylar arasynan úzdikterdi tańdady. 43 qazaqstandyq JOO-nyń 150 oqytýshysy jeńimpaz atandy. Olardyń árqaısysy 2000 AEK kóleminde syıaqy alady, dep habarlaıdy Almaty-akshamy.kz.
Ǵylym jáne joǵary bilim mınıstrliginiń málimetinshe, aqshalaı yntalandyrýdan basqa, «Joǵary oqý ornynyń úzdik oqytýshysy» baıqaýynyń jeńimpazdary tósbelgige ıe bolady.
Konkýrs jyl saıyn oqytýshy mamandyǵynyń bedelin arttyrý jáne olardy odan ári kásibı damýǵa yntalandyrý maqsatynda ótkiziledi.
Baıqaýǵa elimizdiń 80 joǵary oqý ornynan barlyǵy 768 úmitker qatysty. Konkýrsta elektrondyq oqý resýrstaryn, materıaldardy ázirleý jáne jarıalaý, otandyq jáne halyqaralyq jýrnaldarda ǵylymı jarıalanymdar, ónertabysqa patentterdiń bolýy jáne t. b. kórsetkishter baǵalandy. Sondaı-aq úmitkerdi oqytý sapasy, onyń bakalavrıat, magıstratýra jáne doktorantýrada kadrlar daıarlaý jónindegi jumysy baǵalandy.
Aıta keteıik, baıqaý QR ǴJBM aqparattyq júıesi bazasynda ótti, ol arqyly qatysýshylar barlyq kezeńderdiń ashyqtyǵyn baıqaı aldy. «JOO-nyń úzdik oqytýshysy – 2023» konkýrsyna qatysý úshin ótinimder men qujattar elektrondyq formatta qabyldandy. Bul baıqaýdy ótkizýdiń ashyqtyǵyn qamtamasyz etti.
Komısıa quramyna ÚEU, joǵary oqý oryndary qaýymdastyǵynyń ókilderi jáne bilim berý salasyndaǵy sarapshylar engizildi.
Jeńimpazdar tizimimen QR Ǵylym jáne joǵary bilim mınıstrliginiń resmı saıtynda tanysýǵa bolady.