Túrkıa Prezıdenti Rejep Taıyp Erdoǵan men onyń áıeli elde shyǵarylǵan TOGG elektromobıliniń alǵashqy ıeleri atandy
TOGG T10X, C klasty krosover Ankaradaǵy Prezıdent saraıynda ótken saltanatty sharada konveıerden jańa shyqqan, eki tústi – qyzyl jáne qoıý kók túste usynyldy. Qyzyl tús Túrkıanyń birinshi hanymy Ámına Erdoǵanǵa arnalǵan, dep habarlaıdy Almaty-akshamy.kz Astanatv.kz-ke silteme jasap.
Túrkıa Prezıdenti "Anatolý" dep atalatyn qyzyl kólikti basqardy. Alaıda aldaǵy ýaqytta qoıý kók kólikpen júretinin aıtty.
"Búgin biz halqymyzdyń 60 jyldyq armanynyń oryndalǵanynyń kýási boldyq. TOGG rekordtar jańartty jáne bul bizdiń jeke kóligimiz", - dedi Erdoǵan.
2022 jyldyń qazan aıynda Býrsa provınsıasynyń Gemlık qalasyndaǵy túrik elektromobıl zaýyty elektromobılderdiń serıalyq óndirisin bastady jáne oǵan Erdoǵannyń ózi qatysty. Bolashaqta bul zaýyt 6 túrli tústi elektromobılderdiń 5 nusqasyn shyǵarady.
Ázirge eki model shyǵaryldy. Olar: TOGG T10X SUV C klasyndaǵy jol talǵamaıtyn kólik jáne TOGG T10S sedan. Jobaǵa 13 jyl ishinde 3,7 mıllıard dollar ınvestısıa salynady. Sondaı-aq osy jyldyń qazan aıynda elektromobıldiń ekinshi nusqasy – sedannyń tusaýy kesiletini habarlandy.
TOGG bas dırektory Gýrjon Karakosh jýrnalıserge jylyna 100 myń kólik shyǵarýdy josparlap otyrǵandaryn aıtty. Óndiristik qýattylyq bul kórsetkishti jylyna 175 000-ǵa jetkizýge eseptelgen. 2030 jylǵa qaraı bir jylda qurastyrylatyn kólikter sany jarty mıllıonǵa jetedi.