Kóktemniń bastalýymen Almatynyń barlyq aýdandarynda qalpyna keltirý jumystary bastaldy – joldardyń shuńqyrlaryn jóndeý, oryndyqtardy, qorshaýlardy, qoqys jáshikterin, aıaldamalardy jáne basqa da obektilerdi syrlaý jumystary júrgizilýde. Aýdandarda qoqys jınaý senbilikteri de ótedi, dep habarlaıdy almaty-akshamy.kz
Alataý aýdanynda Raıymbek dańǵylynda jáne Saın, Rysqulov, Momyshuly, Kýdrın, Emsov jáne basqa da kóshelerde shuńqyrlardy jóndeý jumystary bastaldy. Jumystarǵa 3 brıgada, 9 birlik tehnıka jáne 15 jumysshy jumyldyryldy. Aýdanda Saıaly skverinde, Móńke bı, Ahanov kóshelerinde, sondaı-aq "Zerdeli", "Qarasý", "Alǵabas", "Ójet" jáne basqa da shaǵynaýdandarda senbilikter ótti. Jaqyn arada 1200 ýrna, 1200 oryndyq jáne 300 metr qorshaý syrlaý josparlanǵan.
Almaly aýdanynda Abaı, Jambyl, Manas jáne Gogol kóshelerinde bastalǵan shuńqyrdardy jóndeý jumystaryna 2 brıgada, 7 birlik tehnıka jumyldyryldy. Aýdanda 1057 ýrna men 958 oryndyqty boıaý josparlanýda. Syrlaý jumystaryna 30 adam, 5 birlik tehnıka jumyldyryldy. Aýdanda 5 jergilikti senbilik ótti: Saıran kóliniń shyǵys jaǵalaýynda (Abaı dańǵylynan Tóle bı kóshesine deıin), Úlken Almaty ózeniniń shyǵys jaǵalaýynda (Tóle bı kóshesinen Raıymbek dańǵylyna deıin), Brýsılovskıı jáne Prokofev kóshelerinde, sondaı-aq Nazarbaev-Abaı-Raıymbek dańǵyldarynyń kvadratynda jáne Saıran kóliniń shyǵys jaǵalaýy. Senbilikterge 1650 adam, 119 birlik tehnıka jumyldyrylyp, 1808 tekshe metr qoqys shyǵaryldy.
Áýezov aýdanynda Jandosov, Almaty, Shalápın, Súleımenov, Asqarov kósheleri, Abaı dańǵyly (Saın jáne Momyshuly kósheleriniń arasynda), sondaı-aq "Mamyr-3" shaǵynaýdanynyń ótpeli joldarynyń shuńqyrlary jóndeldi. Bul jumystarǵa 2 brıgada, 8 birlik tehnıka jumyldyryldy. Aýdanda 1800 ýrna, 1700 oryndyq, 169 aıaldama, 300 metr qorshaý, 600 shaǵyn sáýlet pishinderi 200 kabel qoraby, sondaı-aq 5 jer ústi jáne 4 jerasty ótkelderin syrlaý josparlanýda. Bul proseske 60 qyzmetker, 12 tehnıka jumyldyrylǵan.
Aýdanda 15 jergilikti senbilik ótti: Saıran kóliniń batys jaǵalaýynda, Úlken Almaty ózeniniń batys jaǵalaýynda (Jandosov kóshesinen joǵary), sondaı-aq Sımferopol, Naýaı, Karskoı kóshelerinde, "Aqsaı-1A", "Dostyq", "Jetisý-3", "Taýgúl" shaǵyn aýdandarynda, sondaı-aq 3-shi jáne 4-shi shaǵynaýdandarda. Barlyǵy 437 adam, 40 birlik tehnıka qatysyp, 200 tonnadan astam qoqys shyǵaryldy.
Bostandyq aýdanynda Jeltoqsan, Naýryzbaı batyr, Tımırázev, Jarokov, Baıtursynov, Jandosov, Isınalıev, Úshkempirov jáne basqa da kóshelerdegi jol-asfalt tósemderin aǵymdaǵy jóndeý jumystary júrgizilýde. Sondaı-aq, ál-Farabı, Nazarbaev jáne Abaı dańǵyldarynda shuńqyrlardy jóndeý jumystary júrgizilýde. 3 331 oryndyqty, 4 643 ýrnany, sondaı-aq aýdan aýmaǵynda ornalasqan bólý qorshaýlaryn syrlaý jumystary josparlanýda.
Aýdannyń merdigerlik uıymdary turǵyndarmen birlesip, ózenderdiń, kanaldardyń jaǵalaýlarynda, sondaı – aq ıesiz aýmaqtarda 7 jergilikti senbilikti uıymdastyrý boıynsha jumystar júrgizdi. Barlyǵy 315 adam, 50-ge jýyq arnaıy tehnıka jumyldyryldy, 175 tekshe metr qoqys, laı, qum, butaqtar, qurylys qoqystary jáne t. b. shyǵaryldy.
Jetisý aýdanynda shuńqyrlardy jóndeý, sondaı-aq oryndyqtar men ýrnalardy syrlaý sáýir aıynyń sońyna deıin júrgiziledi. Kóktemgi maýsymnyń basynan beri aýdanda senbilikter 8 túrli jerde ótti. Barlyǵy 211 adam, 29 birlik tehnıka qatysyp, 84 tekshe metr qoqys shyǵaryldy.
Medeý aýdanynda Dostyq jáne Nazarbaev dańǵyldarynda, sondaı-aq Sátbaev, Omarov, Kereı Jánibek handar, Qazybek bı, Qaldaıaqov, Bógenbaı batyr, Tóle bı kóshelerinde joldardyń shuńqyrlaryn jóndeý júrgizildi. Aýdan aýmaǵynda syrlaý jumystary áli júrgizilgen joq. 1679 oryndyq, 1694 ýrna syrlaý josparlanǵan. Buǵan 45 qyzmetker men 5 tehnıka jumyldyrylady. Senbilikter Terenkýr demalys aımaǵynda, ÚAK boıynda (Buqtyrma kóshesi), Shýhov skverinde, Esentaı ózeniniń jaǵasynda jáne "Temirjolshy" baý-baqsha seriktestiginde ótti.
Naýryzbaı aýdanynda Qonaev, Sabdenov, Áshimov, Ábdildın kósheleriniń shuńqyrlary jóndeldi. Aǵymdaǵy jyldyń 30 sáýirine deıin 27 kóshede jóndeý jumystary josparlanǵan. Merdiger uıymdardyń kúshimen sáýir aıynyń ortasyna deıin oryndyqtardy, ýrnalardy, qorshaýlardy, shaǵyn sáýlet pishinderin syrlaý jumystary josparlanǵan. Barlyǵy 625 ýrna, 519 oryndyq, 139 aıaldama keshenin syrlaý josparlanýda.
Aýdanda Raıymbek, Alataý dańǵylynda, Abaı saıajaılarynda, sondaı-aq Beljaılaý, Karera, Júnisov, Aımanov jáne basqa da kóshelerde 5 jergilikti senbilik ótti. 1200 adam, 125 birlik arnaıy tehnıka, 1800 tekshe qoqys shyǵaryldy.
Túrksib aýdanynda Maılın, Buqtyrma, Lavrenev, Bekmahanov, Shemákın jáne t.b. kóshelerindegi jol jabynyn qalpyna keltirý jumystary bastaldy. Alańy 800 sharshy metrden asady. Jumystarǵa 2 brıgada, 8 birlik tehnıka jumyldyryldy. Aýdanda 470 ýrna, 60 oryndyq, 300 metr qorshaý, sondaı-aq 4 jer ústi jáne 3 jerasty ótkelderin syrlaý jumystary bastaldy.
Qazirgi kezde kóktemgi qalpyna keltirý-jóndeý jumystary qalanyń barlyq aýdandarynda júrýde, sonyń ishinde qysqy kezeńnen keıin qalany abattandyrý jáne tazalaý jumystary odan ári jalǵasýda.