Qazaqstan halqyna amandyq pen baq-bereke tiledi
Memleket basshysy Qasym-Jomart Toqaevtyń atyna Túrkıa Prezıdenti Rejep Taııp Erdoǵannyń alǵys haty kelip tústi, dep habarlaıdy Almaty-akshamy.kz.
Túrkıa Prezıdenti Rejep Taııp Erdoǵan óziniń hatynda Túrkıanyń Qahramanmarash provınsıasy men basqa da eldi mekenderine orasan zor zardabyn tıgizgen joıqyn jer silkinisine baılanysty baýyrlas eldiń qaıǵysyna ortaqtasyp, kóńil aıtqany, sondaı-aq jedel kómek kórsetkeni úshin Memleket basshysy Qasym-Jomart Toqaevqa Túrkıa halqynyń jáne jeke óziniń atynan alǵys aıtqan.
"Osyndaı tabıǵı apat kezinde dostas elderdiń janymyzdan tabylýy qıyndyqqa qarsy turýǵa kúsh beredi. Qazaqstannyń bergen járdemi jer silkinisiniń aýyr saldarymen kúres kezinde halqymyzǵa zor qoldaý boldy. Elińizdiń izdestirý-qutqarý toby úıindi astynda qalǵan adamdardy aman saqtap qalý úshin aıanbaı eńbek etip, erik-jiger tanytqanyn árdaıym rızashylyqpen eske alamyz", – dep jazylǵan alǵys hatta.
Sonymen qatar Rejep Taııp Erdoǵan Qasym-Jomart Toqaevqa jáne dostas ári baýyrlas Qazaqstan halqyna amandyq pen baq-bereke tiledi.
6 aqpanda Túrkıa men Sırıada on myńdaǵan azamattardyń ómirin qıǵan qatty zilzala boldy.
Sol kúni Qazaqstan Prezıdenti Qasym-Jomart Toqaev Úkimetke Túrkıaǵa shuǵyl kómek kórsetýdi tapsyrdy. Qazaqstandyq qutqarýshylar men dárigerler zardap shekken aımaqtarǵa attandy.