Olardyń ata-anasy da shaqyryldy
Almatyda qurylysy aıaqtalmaǵan ǵımarattyń ústine shyǵyp otyrǵan eki jasóspirim anyqtalyp, ata-anasymen birge polısıa basqarmasyna jetkizildi, dep habarlaıdy Almaty-akshamy.kz QazAqparatqa silteme jasap.
Almatyda Abaı jáne Tilendıev kósheleri qıylysyndaǵy qurylysy aıaqtalmaǵan bıik ǵımarattyń ústinde alańsyz otyrǵan eki jasóspirimniń vıdeosy ınternette tarady.
Jeli qoldanýshylary vıdeo astyna «ata-analary qaıda qarap otyr?», «bul ǵımarattyń osylaı qaraýsyz, salynbaı turǵanyna qansha jyl boldy, ony birjaqty etetin mezgil jetti», «jastar selfı jasap jatyr», «ótken jyly bul jerden jas adam sekirip ketip, qaza tapty» degen pikirler qaldyrdy.
Almaty qalalyq polısıa departamenti jasóspirimderdi anyqtap, polısıa basqarmasyna jetkizgenin habarlady.
«Iývenaldy polısıa bóliminiń ınspektorlary jasóspirimderdiń kim ekenin anyqtap, olardy Almaly aýdanynyń polısıa basqarmasyna apardy. Olardyń ata-anasy da shaqyryldy. Olarǵa quqyqtyq túsindirý jumystary júrgizildi», - dep habarlady polısıa.
Eske salaıyq, QR Indýstrıa jáne ınfraqurylymdyq damý mınıstrligi aldaǵy alty jylda 50 problemalyq turǵyn úıdiń qurylysy aıaqtalyp, óńirlerde 1 500 apatty jáne tozyǵy jetken úılerdi buzý, 40 myń menshik ıesiniń turǵyn úı máselelerin sheshý jónindegi óńirlik baǵdarlamalar qabyldanatynyn málimdegen bolatyn.