Búgingi kúnniń batyry: Almaty oblysynda segizinshi synyp oqýshysy baqylaýsyz qalǵan avtobýstyń jolaýshylaryn aman alyp qaldy
24 qarasha kúni İle aýdanynyń turǵyndarymen esep berý kezdesýinde Marat Sultanǵazıev óziniń áreketimen aýyr oqıǵanyń aldyn alǵan jas batyrdy quttyqtady. 22 qarashada mektepten qaıtyp kele jatqan bala ondaǵan jolaýshy men baqylaýsyz qalǵan avtobýs júrgizýshisiniń ómirin saqtap qaldy, dep habarlaıdy Almaty-akshamy.kz.
Eger segizinshi synyp oqýshysynyń batyl áreketi bolmasa, basqarýdan shyqqan kóp tonnalyq kólik úlken jyldamdyqpen turǵyn úılerge kirip ketýi múmkindigi joǵary bolatyn. Sonda oqıǵanyń saldary áldeqaıda aýyr bolar edi. Biraq baqytymyzǵa oraı, qaıǵyly jaǵdaıdyń aldyn aldy. Qoǵamdyq kólik júrgizýshisiniń kenetten jaǵdaıy nasharlaǵanyn kórgen oqýshy júrip bara jatqan avtobýstyń basqarý salonyna kirip, tejegishti der kezinde basyp, kólikti toqtatyp úlgergen.
№24 mektep-lıseıiniń 8-synybynda oqıtyn keıipkerimiz Aqjol - mekteptiń qoǵamdyq ómirine belsene aralasyp, synyptastary men kishi balalarǵa kómektesýge árqashan daıyn. Aqjol ortasymen tez til tabysatyn, ashyq bala.
Erligi úshin segizinshi synyp oqýshysy Aqjol oblys ákimi Marat Sultanǵazıevtiń qolynan «Alǵys hat» pen iPhone 15 modelin saltanatty túrde aldy.
«Mundaı áreketter erekshe alǵys pen qurmetke laıyq. Biz barsha jastarǵa úlgi bolýy tıis óńirimizdiń jas batyryn maqtan tutamyz», - dedi Almaty oblysynyń ákimi.
Sondaı-aq Sultanǵazıev bul is erlik pen batyldyqtyń, jaýapty istiń úlgisi ekenin atap ótti.
Aqjol «naǵyz batyr», shynynda da jaqsy ata-ananyń jaqsy bala tárbıeleıtinin dáleldedi.