Kelesi jyly Almatyda shaǵyn jáne orta bıznesti qoldaýǵa 70 mlrd teńgeden astam qarjy jumsalady*
Shaǵyn jáne orta bıznes Almaty ekonomıkasynyń negizin quraıdy. Onyń qalalyq ekonomıkany damytýǵa qosqan úlesi 2024 jyly 60%-dy quraıdy dep kútilýde. Bul týraly 2025-2027 jyldarǵa arnalǵan qala búdjeti qabyldanǵan qalalyq máslıhat sesıasy barysynda megapolıs ákimi Erbolat Dosaev málimdedi.
"Búginde shaǵyn jáne orta bıznes sektorynda 942 myńǵa jýyq almatylyqtar jumys isteıdi, bul qalada jumyspen qamtylǵandardyń jalpy sanynyń 85% - dan astamyn quraıdy. Qalada qurylatyn turaqty jumys oryndarynyń 80% - y SHOB-qa tıesili", - dedi Erbolat Dosaev.
Onyń aıtýynsha, bıyl SHOB-ty qoldaý jáne damytý úshin búdjetten 53,1 mlrd teńge bólingen. Bul qarajat kásipkerlikti sýbsıdıalaýǵa, kepildendirýge jáne kredıtteýge baǵyttalǵan, bul jalpy somasy 125,3 mlrd teńgege 1,8 myń jańa jobany qoldaýǵa múmkindik berdi.
2025 jyly SHOB-ty qoldaýǵa qarjylandyrýdy 71 mlrd teńgege deıin ulǵaıtý josparlanýda. Bul 4 myńnan astam shaǵyn jáne orta bıznes sýbektileriniń damýyn qoldaýǵa múmkindik beredi.
Bul sharalar Almatynyń elimizdiń ekonomıkalyq ortalyǵy retindegi ustanymyn nyǵaıta otyryp, 2030 jylǵa qaraı SHOB salymyn 75% - ǵa deıin ulǵaıtýǵa yqpal etedi, dep túıindedi qala ákimi.
Aıta keteıik, 2025 jylǵa Almaty qalasynyń búdjeti 2 trln 177 mlrd teńgeni qurady. Bul búdjet 1 trln 70 mlrd. teńgeni quraǵan 2022 jyldyń basymen salystyrǵanda 2 ese kóp. Búdjet áleýmettik baǵdarlanǵan kúıinde qalyp otyr. Áleýmettik salaǵa arnalǵan shyǵystar 15% - ǵa nemese 110,6 mlrd teńgege, ıaǵnı 851,9 mlrd teńgege deıin ulǵaıdy, bul búdjettiń jalpy shyǵystarynyń 40% -yn quraıdy.