Qabyldanǵan búdjette qalanyń seısmıkalyq qaýipsizdigin qamtamasyz etýge baǵyttalǵan sharalarǵa qarajat bólingen.
Almaty qalasynyń 2025-2027 jyldarǵa arnalǵan búdjeti máslıhattyń kezekten tys sesıasynda bekitildi, dep habarlaıdy aqshamnews.kz
Ǵımarattar men qurylystardyń seısmıkalyq qaýipsizdigin arttyrý uzaq merzimdi jáne aýqymdy qarjyny qajet etetin úderis bolǵandyqtan, bul maqsatqa shamamen 14 mlrd teńge qarastyrý josparlanyp otyr.
Halyqaralyq tájirıbege sáıkes, qalada nysandardyń naqty seısmoturaqtylyǵyn anyqtaý úshin tólqujattaý júrgizilýde. Osy jumystyń nátıjesinde 2025 jyly Japonıa, AQSH jáne Izraıl úlgisinde ǵımarattardy seısmıkalyq kúsheıtýge arnalǵan qalalyq baǵdarlama ázirlenip, engiziledi.
Almatyda áleýmettik jáne ákimshilik memlekettik ǵımarattardy seısmıkalyq kúsheıtý jumystary jyl saıyn júrgiziledi. 2025 jyly Bostandyq jáne Medeý aýdandaryndaǵy 3 mektepti seısmıkalyq kúsheıtý aıaqtalady, sondaı-aq, Túrksib aýdanyndaǵy №50 mektep-lıseıde seısmıkalyq nyǵaıtý jumystary bastalady. Áýezov, Bostandyq jáne Medeý aýdandaryndaǵy 7 balabaqshada jumystar qolǵa alynady.
Sonymen qatar, kóshkin qaýpin baǵalaý jáne kóshkin qaýpi bar ýchaskelerdiń (Kishi jáne Úlken Almaty, Qarǵaly, Aqsaı ózenderiniń baseıni) tólqujatyn jasaý úshin 168,8 mln teńge somasyna 3 jyldyq joba júzege asyrylýda.
Ulttyq seısmologıalyq baqylaý jáne zertteý ortalyǵynyń málimetinshe, Almaty aglomerasıasyn tolyq qamtý jáne seısmologıalyq derekterdi óńdeý jyldamdyǵyn arttyrý úshin qazirgi 51 seısmostansıaǵa qosymsha 70 stansıa ornatý qajet. Bul 2025-2026 jyldary júzege asyrylyp, jer silkinisiniń erte eskertý júıesin jetildirýge múmkindik beredi.
Qala aýmaǵy biryńǵaı baǵdarlamalyq qamtamasyz etý arqyly jumys isteıtin seısmodachıktermen qamtylady. Buǵan qosa, Almaty ınfraqurylymyn Qytaı, Qyrǵyzstan jáne Ózbekstan sıaqty kórshiles memleketterdiń júıelerimen ıntegrasıalaýǵa daıyndyq jumystary júrgiziledi.
Qalanyń qaýipsizdigin arttyrý maqsatynda sımýlásıalyq oqý-ádistemelik ortalyqtyń qurylysy da josparlanǵan. Bul joba turǵyndardy tótenshe jaǵdaıda ózin-ózi qutqarý jáne alǵashqy medısınalyq kómek kórsetý daǵdylaryna úıretýge jol ashady. Ortalyq nusqaýshylary azamattarǵa qaýip-qater kezinde ózin-ózi qorǵaý jáne alǵashqy kómek kórsetý ádisterin úıretedi.