Memleket basshysynyń tapsyrmasy aıasynda ázirlengen Almaty aglomerasıasyn damytýdyń 2029 jylǵa deıingi Keshendi jospary Úkimette 2023 jyldyń sońyna deıin qabyldanýy tıis. Bul týraly Almaty ákimi Erbolat Dosaev «Qazaqstan-2023» birlesken sáýlet - qala qurylysy forýmy barysynda habarlady.
«Aglomerasıadaǵy halyq sany búginde 3,5 mıllıonnan asady, boljam boıynsha 2030 jylǵa qaraı 4,5 mln adamdy quraıtyn bolady. «Aglomerasıalardy damytý týraly» jańa Zańdy eskere otyryp, osy jyldyń basynan Almaty aglomerasıasynyń mártebesi zań júzinde bekitildi, onyń ortalyǵy – Almaty qalasy. Almaty aglomerasıasyn damytýdyń 2029 jylǵa deıingi Keshendi josparyn Almaty qalasynyń da, Almaty oblysynyń da máslıhattary maquldady jáne osy jyldyń sońyna deıin Úkimette qabyldanýy tıis», - dedi megapolıs basshysy.
Onyń aıtýynsha, bul qujat Almatyda jáne Almaty oblysynda turǵyn úı, áleýmettik, ınjenerlik jáne kólik ınfraqurylymynyń ozyq damýyn úılestirýge jáne teńestirýge múmkindik beredi.
Erbolat Dosaev Memleket basshysynyń tapsyrmalaryn iske asyrý aıasynda 2022 jyldyń sońynda «Almaty qalasyn damytýdyń 2025 jylǵa deıingi baǵdarlamasy jáne 2030 jylǵa deıingi orta merzimdi perspektıvalarynyń» bekitilgenin atap ótti. Bul baǵdarlama jaıly qalalyq orta, ornyqty ekonomıkalyq ósý, basqarylatyn ýrbandalý, áleýmettik ornyqtylyq pen turaqtylyq, jasyl Almaty, smart sıtı, qaýipsiz qala syndy jeti negizgi qaǵıdatqa negizdelgen. Osynyń negizinde Almaty qalasynyń 2040 jylǵa deıingi jańa Bas jospary ázirlenip, qalalyq turǵyndarymen keńinen talqylandy, ony aǵymdaǵy jyldyń mamyr aıynda QR Úkimeti bekitti.
«Jańa Bas josparda bizdiń megapolıstiń damýynyń monoortalyq modelden polıortalyq modelge kóshý qaǵıdaty qalyptasty. Bes jańa polıortalyq Almatynyń birkelki jáne teńgerimdi damýyna jańa serpin beredi jáne qala turǵyndarynyń ómir súrý sapasynyń turaqty ósýin qamtamasyz etedi», - dedi Almaty ákimi.