Qala damýy kerek.
Almaty qalasy Alataý aýdanynyń turǵyndary shahar basshysy Erbolat Dosaevpen kezdesý barysynda jańa temirjol vokzalynyń qurylysyna baılanysty súriletin úıler jaıynda surady, dep habarlaıdy Almaty-akshamy.kz.
«Arnaıy maqsattaǵy jeke turǵyn úı qurylysyna arnalǵan memlekettik aktke sáıkes jer telimderin zańdy túrde satyp aldyq, bul qujat 2014 jyldyń bas josparyna jáne 2019 jyldyń egjeı-tegjeıli josparlaý jobalaryna sáıkes keledi. Alaıda, 2021 jyldyń 31 jeltoqsanynda Qalalyq josparlaý jáne ýrbanıstıka basqarmasy bizge úılerimizdiń súriletinin habarlady. Sebebin qyzyl syzyqta ornalasqan dep túsindirdi», - dedi "Mádenıet" shaǵynaýdanynyń turǵyny ákimge qoıǵan saýalynda.
Qala basshysynyń sózine júginsek, joba daıyn bolǵanda, arnaıy talqylaý bolady.
«Negizgi qujat - «Almaty qalasynyń 2040 jylǵa deıingi bas jospary», ol jyl sońyna deıin qabyldanady. Men bul buryn qosylǵan aýmaqtar ekenin túsinemin, al siz ol jerdi satyp aldyńyz. Alaıda qala damýy kerek. Turǵyndar biz gazben qamtamasyz ete almaıtyn, tehnologıalyq talaptarǵa saı kelmeıtin jerlerge úı turǵyzǵan. Men bas jospar boıynsha erejelerdi múmkindiginshe tıimdi qaıta qaraý týraly tapsyrma berdim. Joba daıyn bolǵan kezde, biz ony kórsetemiz, birge talqylaımyz jáne sheshim qabyldaımyz», - dedi ákim.
Ákimniń aıtýynsha, qala dál osy aýdanda qarqyndy damyp keledi.
«Eger úılerińiz súrilgen jaǵdaıda, naryqtyq quny boıynsha óteımiz», - dedi Erbolat Dosaev.