QR Premer-Mınıstriniń orynbasary Eraly Toǵjanov megapolıstegi áleýmettik-mádenı damý jáne epıdemıologıalyq ahýaldy turaqtandyrý máseleleri boıynsha Memleket basshysynyń tapsyrmalaryn iske asyrýdyń barysymen tanysý maqsatynda jumys saparymen Almaty qalasyna keldi dep habarlaıdy almaty-akshamy.kz
Vıse-premer kelgen boıda Almaty qalasy ákiminiń orynbasary Erjan Babaqumarovpen birge Alataý aýdanynda salynyp jatqan jańa mektepke bardy.
Aıta keterligi, bul 1800 oryndyq alǵashqy mektep (buryn nysandardyń maksımaldy qýaty 1200 oqýshy ornynan aspaǵan). Qurylys Saıaly shaǵyn aýdanda júrgizilýde, munda ishki kóshi-qonnyń jáne birqatar turǵyn úı keshenderiniń salynýy burynnan bar orta bilim berý mekemeleriniń júktemesin arttyratyny eskerildi. Sondyqtan, jańa mekteptiń qurylysy úsh aýysymdy bilim berýge jol bermeýge baǵyttalǵan.
Búginde qurylys jumystary josparly túrde júrgizilýde, nysandy paıdalanýǵa berý bıylǵy jyldyń sońyna deıin josparlanǵan. Tıimdi bilim berý úderisin uıymdastyrý úshin jaıly kabınet qory, sport jáne akt zaldary jáne t.b. qarastyrylǵan. Barlyq oqý aýdıtorıasy zamanaýı qurylǵylarmen jabdyqtalatyn bolady.
Almatyda barlyǵy 12 600 oryndyq 8 mekteptiń qurylysy júrgizilýde, onyń ishinde 5 100 oryndyq úsheýi (Saıaly shaǵyn aýdanynda – 1800 oryndyq; Tomırıs shaǵyn aýdanynda – 1500 oryndyq; Qalqaman-2 shaǵyn aýdanynda – 1800 oryndyq) bıylǵy jeltoqsan aıynda tapsyrylady. Qalǵan 5 mektepti 2022 jyly aıaqtaý josparlanǵan. Sonymen qatar, qazirgi orta bilim berý mekemelerine qosymsha 17 korpýs pen 13 jekemenshik mekteptiń qurylysy aıaqtalýda. Osylaısha, bıyl jyl sońyna deıin megapolıste 16 myń oqýshy orny iske qosylady, bul qazirgi tapshylyqty 47%-ǵa qysqartady.
QR Premer-Mınıstriniń orynbasary Eraly Toǵjanov halyq ósiminiń joǵary kórsetkishteri jaǵdaıynda 1800 jáne odan da kóp orynǵa arnalǵan aýqymdy mektepter salý praktıkasyn jalǵastyrýdy tapsyrdy.
Vıse-premerdiń jumys sapary barysynda sanıtarlyq-epıdemıologıalyq ahýal, kreatıvti ındýstrıalardy damytý, «Ulttyq rýhanı jańǵyrý» jobasy boıynsha birqatar jumys keńesin ótkizý josparlanǵan.