Almaty Memlekettik qýyrshaq teatry «Naýryznama» onkúndigi sheńberindegi Shańyraq kúni balalar nazaryna «Er Tóstik» spektaklin usyndy.
«Er Tóstik» ertegisiniń teatr tórine shyǵyp, poetıkalyq drama janrynda sahnalanǵanyna birer jyldyń ǵana júzi boldy. Jyl ótken saıyn kishkentaı kórermenderi kóbeımese, azaıǵan joq.
Bul – tili óte baı qıal-ǵajaıyp ertegilerdiń biri. Segiz aǵasyn izdep shyqqan Tóstik jolynda kezdesken barlyq kedergini aqyl-aılasymen jáne Kóltaýysar, Jelaıaq, Shapshań, Saqqulaq, Shalquıryq syndy dostarynyń kómegimen jeńip shyǵady. Jańashyl ıdeıa men ulttyq qundylyqtardy qabystyra bilgen qoıylym balalarǵa unaǵany anyq. Sebebi, qýyrshaqtar beınesindegi keıipkerlerdiń ár qımylyn, ár sózin baldyrǵandar ata-analarymen birge tapjylmaı kórip, tyńdap otyrdy. Bizge keregi de sol. Balalar álemi eń shynaıy. Ári olar ne nárseni de tez sińirip alady. Kishkentaı júrekterge jol tapqan «Er Tóstik» batyrlyq, dosqa adaldyq, qaısarlyq, qaıyrymdylyq, adamgershilik, Otandy súıý syndy qundylyqtardy nasıhattaıdy.
– Biz «Er Tóstik» ertegisin kitaptan oqyp ósken urpaqpyz. Al búgin nemerem spektákl túrinde kórdi. Bul – keremet! Qazaqtyń rýhanı qazynasyn alaqandaı uıaly telefonǵa jipsiz baılanǵan qazirgi urpaqqa osylaı jetkizip otyrý lázim. Bir mezgil osylaı oıyn bólip, kóńilin sergitip, teatrǵa ákelip turýymyz kerek. Qyzyqty ári shym-shytyryq oqıǵalardy keshe otyryp, armanyna jetetin Tóstik batyr men onyń dostarynyń aýyzbirshiligi bizdiń balalarymyzǵa oń áser etetini sózsiz. Balamnyń áserlenip shyqqanyn kórip ózim de qýanyp turmyn, – deıdi almatylyq Baǵlan esimdi kishkentaı kórermenniń apasy, zeınetker-ustaz Sábıra Esenqyzy.
Aıta keteıik, «Er Tóstik» janry – poetıkalyq drama. Avtory – aqyn Qasymhan Begmanov, al rejısery – Erkebulan Qabdyl.
