«Aq jol» Demokratıalyq partıasy Ulttyq keńesiniń plenýmy Qazaqstanda atom elektr stansıasyn (AES) salý máselesin talqylady.
Búgin Prezıdent Qasym-Jomart Toqaevtyń sońǵy Joldaýynda jarıalanǵan jalpyhalyqtyq referendým máselesine baılanysty partıanyń resmı ustanymyn anyqtaý maqsatynda «Aq jol» demokratıalyq partıasynyń Ulttyq keńesiniń plenýmy ótti.
Plenýmda energetıka mınıstri Almasadam Sátqalıevtiń baıandamasy tyńdaldy. Ol elimizdegi ınvestısıalyq jobalardyń júzege asyrylýyn tejeıtin problemalar, 8 GVt elektr energıasynyń tapshylyǵy, atom energetıkasyn damytýdyń bolashaǵy jáne AES qurylysynyń ártúrli nusqalary týraly aqparat berdi.
«Aq jol» demokratıalyq partıasy úshin otandyq bıznes pen ónerkásipti energıamen qamtamasyz etý eń ózekti máselelerdiń biri bolyp tabylady. Osyǵan oraı, energetıka mınıstrligi ókilderi, sonyń ishinde vıse-mınıstr Suńǵat Esimhanov pen «Qazaqstan atom stansıalary» JSHS bas dırektory Tımýr Jantıkın Ulttyq keńes músheleriniń kóptegen suraqtaryna jaýap berdi.
Májilis vıse-spıkeri Danıa Espaeva, Májilis depýtattary Qazybek Isa, Erlan Barlybaev, sondaı-aq basqa da partıa músheleri yqtımal balama sheshimder men AES qurylysynyń merdigerin tańdaýǵa qatysty suraqtaryn qoıdy.
Talqylaý nátıjesinde pleným atom energetıkasyn damytý men AES salýdy qoldap, salany damytýdyń progresıvti jolyn tańdaý qajet ekenin atap ótti. Sonymen qatar, qaýipsizdikti qamtamasyz etý máselesine erekshe kóńil bólindi.