AES salýdy qoldaý jónindegi halyqtyq shtab ókilderi Keles aýdanynda ózin-ózi jumyspen qamtyp júrgen turǵyndarmen kezdesý ótkizdi. Kezdesýge «AMANAT» partıasynyń Túrkistan oblystyq fılıaly atqarýshy hatshysynyń orynbasary Polat Tursynbaev, aýdandyq máslıhat tóraǵasy N.Shaýlıev jáne birqatar máslıhat depýtattary qatysty.
Kezdesý barysynda Polat Tursynbaev kelestikterge referendýmnyń mańyzy, energıa tapshylyǵy máselesi, atom elektr stansıasynyń elge tıgizer paıdasy men onyń qaýipsizdigi týraly keńinen aqparat berdi. Ol atom energetıkasynyń ekonomıkalyq turǵydan mańyzdy ekenin atap ótip, elimizde energıa tapshylyǵy jyldan-jylǵa artyp kele jatqanyn jetkizdi. Qazaqstandaǵy elektr energıasynyń 70 paıyzy kómirden, 20 paıyzy gazdan, 2 paıyzy kún, jel jáne sý kózderinen óndiriletinin aıtty.
«Energetıkalyq ınfraqurylymymyz eskirip barady. Stansıalardyń 65 paıyzy tozǵan. Ásirese, ońtústik aımaqtarda energıa tapshylyǵy aıqyn sezilip otyr. Bul kásipkerlikti damytýǵa úlken kedergi keltirýde. Energetıka salasyndaǵy mamandar atom energetıkasy – osy máseleni sheshýdiń jalǵyz joly ekenin aıtýda. Halyqty alańdatyp otyrǵan basty suraq – qaýipsizdik. Qazirgi tańda álemde 415 ıadrolyq reaktor jumys isteıdi, olardyń barlyǵy damyǵan elderde ornalasqan. Eger AES qaýipti bolsa, órkenıetti elder bul tehnologıadan bas tartar edi. Qazir 60-qa jýyq AES salynýda, onyń ishinde kórshiles Ózbekstan da AES qurylysyna kirisip ketti», – dedi ol.
Sonymen qatar, Polat Tursynbaev Qazaqstannyń ýran óndirý boıynsha álemde kósh bastap turǵanyn, al onyń qory boıynsha ekinshi orynda ekenin atap ótti.
«Damyǵan elder AES-ke qajetti shıkizatty bizden alyp otyr. Iadrolyq otyn óndiretin zaýyt ta ózimizde bar. Biz bul resýrstardy el ıgiligine paıdalanbasaq, onyń paıdasyn qashan kóremiz? Ekonomıkalyq táýelsizdigimizdi nyǵaıtý úshin AES salý mańyzdy qadam», – dep qosty.
AES qurylysyna 2 myń jumysshy tartylatynyn jáne stansıa iske qosylǵannan keıin 8 myń jańa jumys orny ashylatynyn aıtty. Sonymen qatar, AES qurylysy ınfraqurylymdy damytýǵa da serpin beretinin, bul jańa joldar, mektepter, aýrýhanalar jáne turǵyn úıler salynýyna múmkindik týǵyzatynyn atap ótti.