Bıylǵy aqpannyń qorytyndysy boıynsha aıaq kıim baǵasy bir jyl ishinde 20,5 paıyzǵa ósken.
Onyń ishinde erler men áıelder aıaq kıimi 18,2%-ǵa, balalar aıaq kıimi 26,5%-ǵa qymbattady, dep habarlaıdy Almaty-akshamy.kz. Astanatv.kz-ke silteme jasap.
Energyprom zertteýine súıensek, baǵanyń óskenin, ásirese, Mańǵystaý oblysynyń turǵyndary sezindi: óńirde aıaq kıim baǵasy bir jylda birden 31,5%-ǵa qymbattaǵan. Sondaı-aq Shymkent (30,2%) pen Astana (28%) da baǵa ósimi boıynsha aldyńǵy orynǵa shyqty. Eń tómen baǵa Ulytaý oblysynda tirkeldi, degenmen ósim 13,7% quraıdy.
«Erler aıaq kıimi Aqtóbe oblysynda, áıelder aıaq kıimi Mańǵystaý oblysynda, balalar aıaq kıimi Shymkentte kóp qymbattady. Erlerge arnalǵan aıaq kıim baǵasynyń eń tómengi kórsetkishi Ulytaý oblysynda, áıelderdiki Batys Qazaqstan oblysynda, balalar aıaq kıiminiń baǵasy Qostanaı oblysynda tirkeldi. İshki naryqta aıaq kıim satylymy 40,3 mln jupty qurady, bul bir jyl burynǵydan 21,6%-ǵa az», - deıdi sarapshylar.
Bıylǵy qańtar-aqpan aılarynda respýblıkada 286,7 myń jup aıaq kıim shyǵaryldy, bul bir jyl burynǵydan 42,9 paıyzǵa artyq.
«Óńirlik turǵyda eń kóp aıaq kıim Almatyda shyǵaryldy: 153 myń jup – bul 2022 jyldyń qańtar-aqpanymen salystyrǵanda 50,4%-ǵa artyq. Úzdik úshtikke Almaty (48,5 myń jup) jáne Jambyl (27,9 myń jup) oblystary da kirdi», - delingen zertteýde.
Aıta keterligi, jalpy 2022 jyldyń qańtar-jeltoqsan aılarynda elimizde 1,7 mln jup aıaq kıim shyǵaryldy, bul bir jyl burynǵydan 17,6 paıyzǵa artyq.