Almaty ákimi Darhan Satybaldy TAV Airports kompanıasynyń basqarma tóraǵasy Serkan Kaptanmen jumys kezdesýin ótkizdi. Kezdesý barysynda Almaty halyqaralyq áýejaıyn jańǵyrtýǵa qatysty negizgi túıtkilder talqylandy.
Búginde Almaty halyqaralyq áýejaıy jylyna 11 mıllıonnan astam jolaýshyǵa qyzmet kórsetip, Qazaqstandaǵy áýe tasymalynyń 70 paıyzynan astamyn qamtamasyz etip otyr. Taraptar ishki termınaldy qaıta jańartý, ushý-qoný jolaǵyn jańǵyrtý, ınjenerlik jáne jerústi ınfraqurylymdy jańartý josparyn qarastyrdy.
Darhan Satybaldy áýejaıdaǵy avıasıalyq qyzmetterdiń sapasyn arttyrý, kólik qoljetimdiligin qamtamasyz etý jáne halyqaralyq standartty engizý maqsatynda ınvestorlarmen tyǵyz jumys júrgizýdiń mańyzdylyǵyna toqtaldy.
Óz kezeginde Serkan Kaptan ınvestısıalyq bastamalarǵa qoldaý kórsetkeni úshin alǵys bildirip, áýejaıdyń 2050 jylǵa deıingi damý bas josparyn iske asyrýǵa daıyn ekenin rastady.
Kezdesý qorytyndysy boıynsha Almaty ákimi ınvestor usynǵan ishki termınaldyń dızaın-jobasyn jan-jaqty qarastyrýdy, ony qaıta jańǵyrtý jumystaryna qoldaý kórsetýdi, áýejaıǵa baratyn joldardyń sapasyn arttyrýdy jáne bolashaq metropolıten jelisin áýejaı kólik júıesine biriktirý jaıyn pysyqtaýdy tapsyrdy.