Bul týraly sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın málimdedi.
Bıylǵy oqý jylynan bastap İT-mamandyqtardy meńgergisi keletin talapkerler UBT-da ınformatıka páninen test tapsyrady, dep habarlaıdy Almaty-akshamy.kz
«Osy oqý jylynan bastap IT-mamandyqtarǵa túsetin talapkerler qajetti pánderdiń biri retinde ınformatıkadan test tapsyrady. Bul - qýantarlyq jańalyq. Biz bul máseleni Bilim mınıstrligimen birge burynnan beri pysyqtap keldik», - dep jazdy mınıstr áleýmettik jelidegi paraqshasynda.
Aıtýynsha, ınformatıkany UBT-nyń beıindi pánder tizimine kirgizý arqyly pándi oqýǵa qyzyǵýshylyq tanytqan oqýshylar sanyn ulǵaıtýǵa múmkindik bolady. Al bul óz kezeginde ınformatıka muǵalimderi kásibiniń bedeli men mártebesin arttyrady.
«Árbir adam, máselen, matematıkany bilgeni sıaqty baǵdarlamalaý negizderin de bilýi kerek dep oılaımyn. Baǵdarlamalaý kez kelgen kásipte paıdaly bolýy múmkin, meıli, ol medısına bolsyn, ınjenerlik sala bolsyn. Óıtkeni bolashaqtyń barlyq mamandyǵy IT salasymen baılanysty bolatyny shyndyq», - deıdi Mýsın.
Eske salsaq, bıyl aqpan aıynda Oqý-aǵartý mınıstrligi (burynǵy Bilim jáne ǵylym mınıstrligi) İT-baǵyttar boıynsha oqýǵa túskisi keletin talapkerler UBT-da fızıka emes, ınformatıka páninen test tapsyratynyn málimdegen edi.
Vedomstvo 2022-2023 oqý jylynan bastap «Informatıka muǵalimderin daıarlaý», «Aqparattyq tehnologıalar» jáne «Aqparattyq qaýipsizdik» bilim baǵdarlamalary toptaryna túsetin oqýshylar UBT-da «Matematıka+Fızıka» ornyna «Matematıka+Informatıka» kombınasıasyn tapsyratynyn habarlady.