Jeńimpazdarǵa 3 mln teńge kóleminde syıaqy beriledi.
Ustazdar kúni qarsańynda elimizde «Úzdik pedagog» baıqaýy bastaldy. Jeńimpazdarǵa 3 mln teńge kóleminde syıaqy beriledi. Byltyr elimizdiń ár óńirinen 64 muǵalim 3 mln teńgeden alǵan bolatyn, dep habarlady Almaty-akshamy.kz.
«Konkýrsqa mektepke deıingi, orta, tehnıkalyq jáne kásiptik bilim berý uıymdarynyń shtattaǵy pedagogteri qatysa alady. Bıyl sıfrlandyrý baǵytynda úlken jumys atqaryldy. Baıqaýdyń barlyq kezeńi, naqtyraq aıtqanda, qatysýshylardy tirkeýden bastap respýblıkalyq kezeńniń qorytyndysyn shyǵarýǵa deıin tolyǵymen sıfrlandyrylǵan», - delingen Oqý-aǵartý mınıstrliginiń baspasóz qyzmetiniń habarlamasynda.
Qujattardy qabyldaý 12 qyrkúıekte bastalyp, 2022 jylǵy 22 qyrkúıekke deıin jalǵasady. Baıqaý týraly aqparat elimizdiń barlyq 380 myń muǵalimi paıdalanatyn kundelik.kz júıesinde ornalastyrylady.
Sondaı-aq baıqaý tarıhynda alǵash ret barlyq kezeń, ıaǵnı qatysýǵa ótinimderdi qabyldaý, tirkeý, konkýrs qujattaryn tapsyrý, baǵalaý https://teachercontest.iac.kz/ veb-portalynda júzege asyrylady.
«Bul baıqaýdyń mańyzy zor, óıtkeni ol úzdikterdiń ishindegi ondaǵan úzdik pedagogtiń eńbegin tanýǵa múmkindik beredi. Júlde qoryn ulǵaıttyq jáne bul myqty mamandardyń mamandyqqa kelýine túrtki bolyp, osy kásipte ondaǵan jyldar boıy eńbek etip kele jatqan mamandarǵa kórsetilgen qurmet bolady dep senemiz. «Úzdik pedagog» ataǵyna bilim berý uıymdarynda jumys isteıtin jáne qujattardy tapsyrý kezinde keminde bes jyl úzdiksiz pedagogıkalyq ótili bar pedagogter úmitker bola alady. Bul - balabaqsha, mektep, kolej muǵalimderi. Baıqaý aıasynda muǵalimniń bilim salasyn damytýǵa qosqan úlesi, ustaz qyzmetiniń tıimdiligi men onyń kásibı sheberligi eskeriledi. Bir aıta keterligi, jyldan jylǵa úmitkerler sany ǵana emes, olardyń daıyndyq deńgeıi de artyp keledi. Bul jalpy bilim sapasy men pedagog mártebesiniń artqanyn kórsetedi. Bıyl baıqaýǵa qatysatyn árbir pedagog saýalnamany toltyrǵannan keıin konkýrstyń odan arǵy dınamıkasyn baqylaı alady, mysaly, qatysýshylar qaı kezeńde tur, olarǵa sarapshylar qandaı upaı qoıdy», - dep túsindirdi QR Oqý-aǵartý mınıstrliginiń Orta bilim berý komıteti tóraǵasy Gúlmıra Kárimova
Baıqaý úsh kezeńnen turady:
- I kezeń – aýdandyq, qalalyq deńgeı;
- II kezeń – oblystyq deńgeı;
- III kezeń – respýblıkalyq deńgeı.
Eki baıqaýdyń qorytyndysy boıynsha eń joǵary bal jınaǵan muǵalimder respýblıkalyq deńgeıge ótedi.
Respýblıkalyq «Úzdik pedagog» baıqaýy 2012 jyldan beri ótkizilip keledi. Osy ýaqyt aralyǵynda baıqaý aıasynda mektepke deıingi jáne orta, tehnıkalyq jáne kásiptik bilim berý uıymdarynyń 600-ge jýyq úzdik pedagogi anyqtaldy.
«Úzdik pedagog» ataǵynyń ıegerlerine 3 mln teńge kólemindegi aqshalaı syıaqy ǵana emes, tósbelgiler de beriledi.
Baıqaý erejeleri týraly qosymsha aqparat Oqý-aǵartý mınıstrliginiń saıtynda bar.