SMS 1414 nómirinen keledi.
Habarlama 13 aqpannan bastap joldanady, dep habarlaıdy Almaty-akshamy.kz
Eńbek jáne halyqty áleýmettik qorǵaý mınıstrligi 23 jastan 35 jasqa deıingi jumyssyz júrgen 12 myń jas azamatqa SMS joldaıdy. Mınıstrliktiń halyqty jumyspen qamtý departamentiniń dırektory Asqar Nıazov habarlama ne úshin jiberiletinin túsindirdi.
"Buryn biz jumyssyz júrgen azamattardyń ózderi ótinish jibergenin kútip otyratyn edik. Endi biz olardyń telefonyna ózimiz SMS jiberemiz. Habarlamada Eńbek mınıstrligi álgi azamatqa jumys izdeý múmkindigin paıdalanýdy, tegin oqýdan ótýdi nemese jumysynan aıyrylý boıynsha áleýmettik tólem alýdy usynady. Qosymsha aqparat qajet bolsa, habarlamada turǵan siltemeni basýǵa bolady. Siltemege ótken adam qandaı bos jumys oryndary bar, biliktilikti arttyrý kýrstaryna qalaı barýǵa bolady degen sıaqty suraqtarǵa jaýap alady. Nemese 1414 nómirine qońyraý shalýǵa bolady", - dep túsindirdi Nıazov.
Aıtýynsha, mınıstrlik jumyssyz jastardy 8 áleýmettik top boıynsha iriktep alǵan. Ár jas toby boıynsha 1 000 SMS-habarlama jiberý josparlanyp otyr.
"Bul - bizdiń alǵashqy pılottyq jobamyz. Sol sebepti 12 myń habarlamamen shektelip qalmaımyz. Budan keıingi kezeńderde biz SMS sanyn ulǵaıtamyz", - dedi departament dırektory.
Nıazovtyń aıtýynsha, qazir respýblıka boıynsha jastar arasyndaǵy jumyssyzdyq kórsetkishi – 3,8 paıyz nemese 80 myń adam. Olardyń kóbi Túrkistan, Jambyl oblystary men Almaty qalasynan.
SMS-habarlama jiberý arqyly mınıstrlik halyqpen keri baılanys ornatýdy kózdep otyr. Óıtkeni jumyssyzdar arasynda ózin-ózi jumyspen qamtyp otyrǵan, biraq zeınetaqy jarnasyn, áleýmettik aýdarymdardy tólemeıtin azamattar bolýy múmkin. Iaǵnı habarlama joldaý arqyly osy sanattaǵy azamattardyń qazirgi statýsy da anyqtalady.