Onda ómirdiń túrli kezeńderinde, ómirlik jaǵdaıǵa baılanysty kórsetiletin áleýmettik qorǵaý jáne qoldaý sharalarynyń barlyq kesheni júıelendiriletin bolady.
QR Eńbek jáne halyqty áleýmettik qorǵaý mınıstri Serik Shápkenov halyqqa esep berý kezdesýinde Qazaqstannyń áleýmettik qamsyzdandyrý júıesin sapaly jaqsartýǵa baǵyttalǵan Áleýmettik kodeksti ázirleý úshin qalyptastyrylǵan negizgi tásilder týraly aıtyp berdi, dep habarlady Almaty-akshamy.kz.
Serik Shápkenov Memleket basshysynyń tapsyrmasy boıynsha Eńbekmıni Áleýmettik kodeksti ázirleý boıynsha jumys júrgizilip jatqanyn eske saldy.
«Áleýmettik kodeks tujyrymdamasy ázirlendi, onda áleýmettik qamsyzdandyrý júıesin sapaly jaqsartýǵa baǵyttalǵan negizgi tásilder qalyptastyryldy», – dep habarlady mınıstr.
Eńbekmıni basshysynyń aıtýynsha, Áleýmettik kodeks tujyrymdamasynda:
- áleýmettik quqyqtar men kepildikterdi qamtamasyz etý jónindegi sharalardy kúsheıtý (azamattardyń quqyqtyq saýattylyǵyn arttyrý; muqtaj otbasylardy áleýmettik qoldaý ınstıtýtyn damytý; halyqtyń áleýmettik ál-aýqat ındeksin engizý);
- azamattardy áleýmettik qoldaýdy jańǵyrtý (Áleýmettik qamsyzdandyrýdyń halyqaralyq eń tómengi normalarynan kem emes deńgeıde áleýmettik tólemderdi qamtamasyz etý; áleýmettik qyzmetterdi jan basyna qarjylandyrýdy engizý);
- áleýmettik standarttardy usynýdyń ıntegrasıalanǵan modelin engizý («Sıfrlyq áleýmettik kartany» engizý; áleýmettik salanyń baǵyttary boıynsha aldyn alý sharalaryn qabyldaý);
- Memlekettik qyzmetterdi transformasıalaý jáne olardyń reınjınırıngi (ótinish berýden proaktıvti qyzmet kórsetýge kóshý; syrttaı kýálandyrý, ataýly áleýmettik kómek kórsetý prosesterin avtomattandyrý);
- áleýmettik ınstıtýttardy reformalaý kózdeledi (zeınetaqy men járdemaqy taǵaıyndaý jónindegi fýnksıalardy bere otyryp, Memlekettik áleýmettik saqtandyrý qory bazasynda Memlekettik áleýmettik qor qurý; áleýmettik salanyń qarjy aǵyndaryn (RB jáne búdjetten tys qorlar qarajatyn) shoǵyrlandyrý).
«Áleýmettik kodeksti qabyldaý keleshekte azamattardyń ózderiniń áleýmettik quqyqtary men mindetteri týraly biryńǵaı bilim kózin qurýǵa; áleýmettik quqyqtar men kepildikterdi qamtamasyz etý boıynsha aldyn alý sharalaryn qabyldaýǵa; azamattardyń áleýmettik qorǵalýyn arttyrýǵa múmkindik beredi», – dep atap ótti Serik Shápkenov.