Jaz - eńbek demalysynyń kezeńi. Qyzmetker eger zańdy eńbek demalysyna shyqqanda bastyǵy jumys boıynsha habarlassa, jaýap bermeýine bola ma? Bastyǵy ony mazalaǵan jaǵdaıda ne bolady? Jumysshyǵa ne istemek kerek? Aqshamnews.kz tilshisi zańgerden surap bildi.
Eńbek demalysynyń eń az ýaqyty qansha?
Qazaqstan Respýblıkasynyń Eńbek kodeksine sáıkes, árbir qyzmetker jyl saıynǵy aqy tólenetin eńbek demalysyna quqyly. Bul – jumysshynyń zańmen qorǵalatyn quqyǵy. Onyń maqsaty – qyzmetkerdiń densaýlyǵyn qalpyna keltirý, kúsh-qýatyn tolyqtyrý jáne jeke isterine ýaqyt bólý.
Eńbek demalysynyń eń az uzaqtyǵy – jylyna 24 kúntizbelik kún. Al keıbir sala qyzmetkerleri úshin (muǵalimder, zıandy ortada isteıtinder) bul merzim uzaǵyraq bolýy múmkin.
Bul kezeńde qyzmetker eńbek mindetterinen bosatylady jáne jumys berýshi tarapynan eńbekaqy saqtalady. Demalys ýaqytynda eshqandaı jumysqa tartýǵa jol berilmeıdi, tek qyzmetkerdiń óz erkimen kelisimi bolǵan jaǵdaıda ǵana qosymsha tapsyrmalar oryndalýy múmkin.
Eńbek demalysy kezinde jumystan mazalasa ne isteý kerek?
Zańger Qýat Aýǵanbektiń aıtýynsha, eńbek zańnamasynda demalystaǵy qyzmetkerge qońyraý shalýǵa nemese jazýǵa tikeleı tyıym salynbaǵan. Degenmen bul qadam usynylmaıdy.
"Qyzmetkerdiń jyl saıynǵy aqy tólenetin eńbek demalysy – onyń zańdy quqyǵy. Bul kezeńde ol jumys mindetterin atqarmaýǵa tıis. Sondyqtan basshylyq tarapynan jıi habarlasý durys emes. Tek tótenshe jaǵdaı týyndasa nemese asa mańyzdy másele boıynsha shuǵyl baılanys qajet bolsa ǵana oryndy deýge bolady. Al eger qyzmetkerdiń ózi kelisip, habarlamalarǵa jaýap berse, zańbuzýshylyq bolmaıdy", – deıdi Qýat Aýǵanbek.
Neni eskergen jón?
-
Aldyn ala eskertý: demalysqa shyǵar aldynda basshylyqqa jáne áriptesterge demalys kúnderin naqty kórsetip habarlańyz.
-
Avtojaýap qosyp qoıyńyz: elektron poshtaǵa nemese messendjerge "qazir demalystamyn" degen qysqasha habarlama ornatyp qoıyńyz.
-
İsterdi tapsyryp ketińiz: jumystaǵy aǵymdaǵy mindetterdi áriptesterge bólip berińiz, bul sizge demalysta tynysh bolýǵa kómektesedi.