Prezıdenttikke kandıdat Qasym-Jomart Toqaevty qoldaý jónindegi Respýblıkalyq qoǵamdyq shtabtyń músheleri Batys Qazaqstan oblysynyń turǵyndarymen birqatar kezdesý ótkizdi.
Oral qalasynda RQSH músheleri oblystyń zıaly qaýym ókilderimen, qoǵam belsendilerimen birge kandıdat usynǵan otandyq mádenıet pen ónerdi qoldaýǵa jáne damytýǵa arnalǵan sharalardy talqylady. Kezdesýde elimizdiń ekologıalyq ahýalyn jaqsartýǵa arnalǵan basymdyqtarǵa da mán berildi. Bul Q.Toqaevtyń saılaý aldyndaǵy baǵdarlamasynda belgilengen mindettirdiń biri.
«Batysqazaqstandyqtardy alańdatyp otyrǵan mańyzdy problemalardyń biri – Jaıyq ózeniniń tartylýy. Tabıǵı resýrstardy tıimdi paıdalaný memleket saıasatynyń mańyzdy basymdyqtarynyń qatarynda. Soǵan baılanysty sý resýrtaryn tıimdi paıdalaný, qorǵaý jáne tazalaý úlken mánge ıe. Bul baǵytta qoǵamnyń belsendi ustanymy asa mańyzdy», – dedi Respýblıkalyq qoǵamdyq shtab delegasıasynyń basshysy Máýlen Áshimbaev.
Sondaı-aq Shtab músheleri «Jaıyqjylýqýat» AQ alańynda óńirdegi komýnaldyq kásiporyndardyń ókilderimen kezdesip, batysqazaqstandyqtarǵa Q.Toqaevtyń saılaý aldyndaǵy baǵdarlamasynyń negizgi baǵyttary týraly aıtyp berdi.
RQSH músheleri «Zenıt» zaýytynyń ujymymen kezdesip, kandıdattyń elimizdiń ónerkásiptik áleýetin damytýǵa arnalǵan saıasatyna toqtaldy.
Sonymen qatar Shtab delegasıasy Jáńgir han atyndaǵy Batys Qazaqstan agro-tehnıkalyq ýnıversıtetinde óńirdegi jas agronomdarmen jáne ınjenerlermen júzdesti.
Óńirge kelgen RQSH músheleri etnomádenı birlestikterdiń ókilderimen de kezdesip, etnosaralyq kelisimdi nyǵaıtý máselesin talqylady.