Eńbekqorlyq tabandylyqtan turady
Halyqta «Eńbektiń nany tátti» dep jatady. Buǵan qatysty mysaldar, oqıǵalar jeterlik. Sońǵy ýaqytta osy taqyryp jıi kóterilip júr. Onysy oryndy. Tereńirek barǵanda kósheniń tazalyǵy, eginniń bitik bolýy, ǵylymnyń órleýi bári-bári eńbek adamynyń qolymen jasalady. Ásirese, osy jyly birqatar jandar táýelsizdik merekesi qarsańynda marapat ıelendi. Bul – etken eńbektiń jemisi.
Eńbek – ómir. Eńbek ete bilý – óner hám ómir. Reti kelgen sharýany atqara berýge bolady. Biraq, onyń ara-jigin ajyratyp, maqsatty jumys jasaý ekinshi bir áńgime sanalady. Tańnan keshke deıin jer qazyp, tas qyrnap, aýyr kóterýge de qaýqar kerek. Dese de, ómir-baqı buny qaıtalap, túk óndirmeseńiz, túbi qur dalbasa bolmaq. Bunymen osyndaı sharýany isteýge bolmaıdy deýden qashyqpyz. Degenmen, árbir adamnyń óz tańdaýy bolady.
Kóbimizdiń kóz aldymyzǵa osy sózdi aıtqanda joǵarydaǵy jumystar elesteıdi. Biraq, ishinara oı eńbegi, qol eńbegi, qajyr-qaıratty talap etetin ister, t.b dep bólinetini anyq. Bylaı saraptap qarasańyz, osylardyń bárin júrdim-bardym atqarsaq, arǵy jaǵy qalaı bolmaq? Kim nátıjeli tirlik qylmaq? Meılinshe osyǵan árkim ózinshe taldaý jasaǵany abzal.
Nátıjeli is. Álgiden beri birqatar oılardy qozǵadyq. Jik-jikke bólip toptastyrdyq. Qysqasha taldadyq. Endigi talqy nátıjege tireledi. Jas kúnińnen bastap bir mekemede qyzmet etseńiz nemese kásip ashyp, is qylsańyz, paıdasyn kóresiz. Sózimiz jandy bolý úshin álemge tanymal, joly bolǵan kásipkerler Djef Bezos, Bıll Geıts, Mark Sýkerbergti aıtýǵa bolady. Bul ataqty jandar dúnıeniń qarjylyq, aqparattyq, marketıńtik júıesiniń shyńyn ustap otyrǵandar. Osylardy tanıtyn, isterine elikteıtin, uqsap baqqysy keletinder mıllıondap sanalady. Naǵyz óz isiniń sheberleri desek, dóp meńzegendik bolar edi.
Túıin. Amerıkandyq memleket qaıratkeri ári dıplomat, ǵalym Bendjamın Franklın «Eńbek – baqyttyń atasy» deıdi. Tobyqtaı sózdiń túp atasyn osylaı túıindeýge bolady. Arǵy jaǵyn árkim ózi paıymdaıdy demekpiz.