Memleket basshysyna elimizdiń energetıka salasynyń damýy jóninde baıandaldy.
Maǵzum Myrzaǵalıev Teńiz, Qashaǵan, Qarashyǵanaq, «Qalamqas-teńiz» jáne «Hazar» ken oryndaryndaǵy jobalardy iske asyrý arqyly 2030 jylǵa qaraı munaı óndirý kólemin 104,2 mıllıon tonnaǵa deıin ulǵaıtý josparlanyp otyrǵanyn aıtty, dep habarlaıdy Almaty-akshamy.kz Aqordanyń resmı saıtyna silteme jasap.
Prezıdentke munaı ónimderi naryǵyndaǵy jaǵdaı týraly jáne aldaǵy ýaqytta janar-jaǵarmaı tapshylyǵyn boldyrmaý sharalary jóninde málimet berildi. Mınıstrdiń aıtýynsha, munaı óńdeý zaýyttaryndaǵy jóndeý jumystarynyń merzimin qysqartý jáne 200 myń tonna kóleminde munaı ónimderiniń rezervtik qoryn qalyptastyrý kózdelip otyr.
Sonymen qatar Memleket basshysyna elimizdi gazben qamtý jobalary jóninde baıandaldy. Mınıstrdiń aqparatyna sáıkes, qazirgi tańda gazben qamtylǵan halyqtyń sany 10,3 mıllıonnan asty, al gazben qamtamasyz etý deńgeıi 55 paıyzdy qurady. Soltústik jáne shyǵys óńirlerge gaz jetkizý arqyly 2030 jylǵa qaraı bul kórsetkishti 65 paıyzǵa deıin jetkizý josparlanyp otyr. Bul rette «Beıneý – Bozoı – Shymkent», «Beıneý – Jańaózen» jáne «Buhara – Oral» gaz qubyrlarynyń qosymsha jelileriniń salynýy tabıǵı gazǵa degen joǵary suranysty óteı alady.
Energetıka mınıstri Prezıdentke energıa júıesindegi qazirgi ahýal jáne elektr energıasynyń tapshylyǵyn boldyrmaý úshin qabyldanǵan jedel sharalar, sondaı-aq 2030 jylǵa deıin gaz, munaı, munaı-gaz-hımıa ónerkásibi, munaı óńdeý, elektr energetıkasy men jańartylatyn qýat kózderi salalary boıynsha jalpy quny 30 trıllıon teńge bolatyn 157 ınvestısıalyq jobany júzege asyrý jospary jóninde aıtty.
Kezdesý qorytyndysy boıynsha Qasym-Jomart Toqaev munaı-gaz-hımıa salasyn damytýdyń asa mańyzdy ekenine nazar aýdaryp, Maǵzum Myrzaǵalıevke birqatar tapsyrma berdi.