Eń joǵary jáne tómengi zeınetaqy arasyndaǵy aıyrmashylyqty azaıtamyz – Tamara Dúısenova
Bul týraly Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy Almaty-akshamy.kz QazAqparatqa silteme jasap.
«Bıyl sáýir aıynda áleýmettik sala shyǵyndary qosymsha 4%-ǵa ındeksteldi. Sonda 40-50 myń teńge kólemindegi zeınetaqy 2 myń teńgege ǵana ósse, 300-400 myń teńgedegi zeınetaqy 16 myńǵa ósken. Bul teńsizdikti qalaı azaıtpaq? Bul qarajat eń tómen zeınetaqy men 1 mıllıonǵa jýyq adamnyń tabysynyń eń tómengi kúnkóris deńgeıin kóterýge qanshalyqty múmkindik beredi? Jalpy, ındeksteýden keıin azamattar tólemderdiń ósýin barynsha seziný úshin eń tómengi áleýmettik standarttar ádisnamasyn qaıta qaraý mınıstrliktiń josparynda bar ma?» - dep suraq qoıdy Senat depýtaty Rysqalı Ábdikerov mınıstrge.
Óz kezeginde Tamara Dúısenova zeınetaqy jáne basqa áleýmettik tólemderdi ındeksasıalaý ınflásıa dálizine qaraı búdjettik tártippen jasalatynyn jetkizdi.
«Eń tómengi zeınetaqy, eńbekaqy, járdemaqy jónindegi sizdiń pikirińizmen tolyq kelisemin. Sondyqtan Úkimettiń qazirgi josparynyń ishinde bizdiń de on shaqty josparymyz tur. Eń tómengi zeınetaqydan eń tómengi járdemaqyǵa deıingi standarttardy qaıta qaraımyz. Qazir biz ulttyq jáne halyqaralyq sarapshylardy shaqyryp, jumysty bastadyq. Biraz usynystarymyzdy daıarlap jatyrmyz. Sonyń nátıjesinde jumys toby qurylady dep otyrmyz. Sol jumys tobyna ózderińizdi de shaqyramyz», - dedi ol. Mınıstr shyn máninde problema bar ekenin moıyndaıdy. «Problema bar. Búginde eń tómengi, ortasha jáne joǵary zeınetaqy arasynda úlken aıyrmashylyq paıda boldy. Al eń tómengi áleýmettik standarttardy qaıta qaraý arqyly osy aıyrmashylyqty jóndeımiz», - dedi T.Dúısenova.