Úkimet halyqtyń tabysyn arttyrý baǵdarlamasy aıasynda biraz sharalardy atqarýǵa bekinip otyr.
Negizgi maqsattardyń biri – jumysshylardyń jalaqysyn kóterý, dep habarlaıdy Almaty-akshamy.kz
Premer-Mınıstrdiń orynbasary Eraly Toǵjanov bir mıllıonnan astam jumysshynyń jalaqysy kóteriletinin málimdedi.
«1,1 mıllıonnan astam jumyskerdiń eńbekaqysyn arttyrý kózdelgen. Sonyń ishinde búdjet salasynyń 850 myńnan asa qyzmetkerleriniń laýazymdyq aılyq aqysy ulǵaıtylady. Máselen, dárigerlerdiń jalaqysy 320 myńnan 531 myń teńgege deıin, orta medısına qyzmetkerleriniń jalaqysy 173 myńnan 250 myńǵa deıin ósedi. Pedagog mamandardyń jalaqysy da artady», - dedi Toǵjanov senattyń jalpy otyrysynda.
Onyń aıtýynsha, sáýir aıynan bastap «Samuryq-Qazyna» ulttyq ál-aýqat qory kompanıalar tobynyń 258 myń óndiristik personalynyń jalaqysy 5 prosentten 48 prosentke deıin kóterildi.
«Bul rette jalaqysy tómen laýazymdarǵa basymdyq berildi. «Qazposhta» júıesinde júrgizýshi-kýrerdiń jalaqysy 144 myńnan 237 myń teńgege deıin ósip otyr. Osylaısha, qazirdiń ózinde azamattardyń tabysyn arttyrý boıynsha naqty sharalar júzege asyrylýda», - dep atap kórsetti Toǵjanov.
«Samuryq-Qazyna» qoryna qarasty taǵy tórt kompanıada jyldyń sońyna deıin óndiristik personaldyń eńbekaqysy 5-18 prosentke kóteriledi.
«Budan bólek, memleketten qoldaý sharalaryn alatyn iri bızneske qatysty mindettemelerdi belgileý esebinen onda isteıtin 2,8 mıllıon qyzmetkerdiń ortasha jalaqysy ósedi. Ashyǵyn aıtý kerek, biz mundaı talapty birinshi ret qoıyp otyrmyz. Búginde memlekettiń úlken baǵdarlamalaryna, sonyń memlekettik satyp alýlarǵa qatysatyn kóptegen iri kompanıa bar. Olarmen naqty kelisim jasalǵan», - dedi Úkimet basshysynyń orynbasary.
Toǵjanov osy ýaqytqa deıin jumysshylardyń jalaqysyn kótergen iri kompanıalardy da atap ótti. Olardyń ishinde KAZ Minerals (15 prosent), QazAzot (20 prosent), ERG (25 prosent), Qazaqmys (30 prosent) jáne taǵy basqa kásiporyndar bar. Jalpy, 150-den astam kompanıa jalaqyny kóterýge kelisti.