QR Sý resýrstary jáne ırrıgasıa mınıstri Nurjan Nurjigitov Qazaqstannyń Halyqaralyq Araldy qutqarý qoryna tóraǵalyq etýine arnalǵan apparat keńesin ótkizdi.
Jıynda mınıstrliktiń aldynda turǵan mindetter men olardy iske asyrý jospary talqylandy, dep habarlaıdy Almaty-akshamy.kz Cý jáne ırrıgasıa mınıstrligine silteme jasap.
Birinshi vıse-mınıstr Bolat Beknıaz Qazaqstannyń HAQQ-na tóraǵalyq etý merzimine jol kartasy jasalyp, qordyń Atqarýshy komıtetiniń tóraǵasy taǵaıyndalǵanyn habarlady. Atqarý komıteti Astanada ornalasady, onyń quramyna ár elden eki ókil kiredi. Uıymdastyrý jumystary tolyqtaı aqpan aıynda aıaqtalady.
Sondaı-aq, birinshi vıse-mınıstr Soltústik Araldy qalpyna keltirý jobasynyń ekinshi kezeńine daıyndyq týraly aıtty. Búgingi tańda jobanyń tehnıkalyq-ekonomıkalyq negizdemesi jasaldy jáne qazirgi ýaqytta memlekettik saraptamadan ótýde. Jaqyn arada mınıstr Soltústik Araldy qalpyna keltirý jumystaryna qatysýshy Dúnıejúzilik bank ókilderimen kezdesý ótkizedi.
Al Ortalyq Azıanyń Memleketaralyq sý sharýashylyǵy úılestirý komısıasynyń aldaǵy otyrysynda Soltústik Aralǵa sý jiberýdiń boljamdy kestesi qaralatyn bolady. Aıta ketý kerek, 2023 jyldyń qorytyndysy boıynsha teńizge 2 mlrd tekshe metrden astam sý jiberildi.
«Aldaǵy úsh jyldy biz tıimdi ári utymdy paıdalanýymyz kerek. Birinshiden, árıne, ózimizdiń ulttyq múddemizdi qorǵaý jáne Orta Azıadaǵy kórshiles memlekettermen qarym-qatynasty damytý máselesi. Sondyqtan bul jumys kúndelikti baqylaýda bolýy kerek. Ózderińizge júktelgen mindetterdi jaýapkershilikpen atqaryńyzdar», – dedi QR Sý resýrstary jáne ırrıgasıa mınıstri Nurjan Nurjigitov.
Esterińizge sala keteıik, 2024 jyldyń 1 qańtarynda Halyqaralyq Araldy qutqarý qoryna tóraǵalyq etý kezegi Qazaqstan Respýblıkasyna ótti. Bizdiń elimiz aldaǵy úsh jylda atalǵan uıymdy basqaratyn bolady.