Álemdegi eń baı áıel — L'Oreal konserniniń ıesi Fransýaza Betankýr-Maıers — óziniń baılyǵyn 100 mıllıard dollardan asyryp, tarıhtaǵy birinshi áıel bolyp tanyldy. Bloomberg agenttigi ony mıllıarderler tiziminde 13-orynǵa ornalastyrdy, al Forbes reıtıńinde 15-orynda, dep habarlaıdy aqshamnews.kz.
Búgingi kúni kompanıanyń quny 268 mıllıard dollar dep baǵalanady. Fransýaza Betankýr-Maıers otbasyna L’Oreal aksıalarynyń 35 paıyzy tıesili. Fransýazanyń uldary Vıktor-Jan men Nıkolá kompanıanyń basqarýshylarynyń qatarynda. Vıktor-Jan turaqtylyq jónindegi komıtettiń múshesi, al Nıkolá aýdıt komıtetinde qyzmet etedi.
Fransıanyń eń baı adamdary arasynda Betankýr-Maıers ekinshi oryn alady, ol LVMH negizin qalaýshy Bernar Arnoǵa ($179 mıllıard) jol beredi.
Fransýaza Bettencourt Schueller Foundation qaıyrymdylyq qorynyń negizin qalaýshy. Ol Fransıadaǵy ǵylym men óner salasyndaǵy ártúrli jobalardy qarjylaı qoldaýmen aınalysady. Sondaı-aq aýtıst balalary bar otbasylarǵa kómek kórsetedi.