Myńnan astam oqýshy ulttyq aspappen belgili kúılerdi oryndady.
Búgin elordadaǵy fızıka-matematıka baǵytyndaǵy zıatkerlik mektepte ótken dombyra sabaǵy Gınnestiń rekordtar kitabyna engiziledi. Elordadaǵy fızıka-matematıka baǵytyndaǵy NZM-de 2021-2022 oqý jyly dombyra sabaǵymen aıaqtaldy. Bul sabaqqa 1 032 oqýshy qatysty, dep habarlaıdy Almaty-akshamy.kz Elorda.info saıtyna silteme jasap.
Sabaqty qosymsha bilim berý pedagogi, Qazaqstan Respýblıkasynyń eńbek sińirgen mádenıet qaıratkeri Aıtjan Toqtaǵan ótkizdi. Oqýshylar «Saryarqa», «Balbyraýyn», «Erkem-aı», «Keńes», «Jastar bıi» syndy tanymal kúılerdiń shyǵý tarıhyn baıandaýmen qatar, atalǵan týyndylardy birge oryndady.
El astanasyndaǵy fızıka-matematıka baǵytyndaǵy NIS-te dombyra boıynsha ellektıvti kýrstar 2016 jyly engizildi. Aıtjan Toqtaǵanovtyń jetekshiligimen qurylǵan mektepishilik «Jiger» ansambli - kóptegen respýblıkalyq jáne halyqaralyq mýzykalyq baıqaýlardyń jeńimpazy, «Sun of Italy» ıtalándyq festıvál-baıqaýynyń bas júlde ıegeri, AQSH-tyń ataqty Garvard pen Boston ýnıversıtetteri jáne Massachýsets tehnologıalyq ınstıtýty sahnalarynda óner kórsetti.
Guinness World Records-qa (GWR) ótinim 2021 jyldyń jeltoqsan aıynda berilgen bolatyn.
Kýágerler GWR-diń senimdi ókili retinde qyzmet atqaryp, rekordtyń ornaýy men Kitaptyń barlyq krıterııleriniń tolyq saqtalýyn qamtamasyz etedi.
Guinness World Records erejelerine sáıkes aýqymdy sabaq bastalar aldynda barlyq qatysýshylar eki tirkeý pýnktinen ótedi: birinshisi – jeke beıdjderin skanerleıdi jáne «Kandıdat-marker» baǵdarlamasy arqyly aımaqqa kiredi, ekinshisi – kezekshi qatysýshylardyń mehanıkalyq esebin júrgizedi.
Bir mekteptiń myńǵa jýyq oqýshysy ulttyq mýzykalyq aspapty jetik meńgerip, birge kúı oryndaýy - álemdegi tuńǵysh oqıǵa. Sondyqtan qazaqstandyq rekord asa kórnekti jetistikter men biregeı qubylystar týraly jahandyq anyqtamalyqqa engiziledi dep josparlanyp otyr.
Búgingi tańda elimizdegi barlyq NIS-te dombyra pániniń ellektıvti kýrstary engizilip, onyń aıasynda Qurmanǵazy Saǵyrbaıuly, Táttimbet Qazanǵapuly, Nurǵısa Tilendıevtiń ataqty kúıleriniń tarıhy mindetti túrde oqytylady, al eń tanymal jobalardyń qatarynda «100 kúıdiń tarıhy» jobasy, barlyq mektepterde dombyra ansámblderi men stýdıalary jumys isteıdi, dombyra sabaqtary matematıka, fızıka, shet tili sabaqtarymen ushtastyrylyp, jas mýzykanttar «Uly dala muragerleri» dástúrli fleshmobynda jyl saıyn el sahnalaryn baǵyndyryp keledi.