Qazir álemniń ár túkpirindegi sportsúıer qaýym bizdiń Gımndi, Kók Týymyzdy jaqsy biledi. Dese de, álemdik dodalarda alty Alashtyń kók baıraǵy alǵash ret qaı jyly kóterildi? Ánuranymyzdy eń alǵash ret qaı sportshymyz, qaı jyly asqaqtatty? Kim biledi?
Bul taqyryp áli kúnge deıin sportshylar arasynda daýly másele kúıinde qalyp otyr. Bizdiń biletinimiz, tórtkúl dúnıeni moıyndatyp, eń alǵashqylardyń biri bolyp Ánuranymyzdy shyrqatqan sportshy – 17 jasar almatylyq Ekaterına Polevaıa edi.
Eshkimge belgisiz jas sportshy óziniń dosy, sol kezdegi sý astyndaǵy baǵdarlaý boıynsha KSRO quramasynyń Eýropa chempıony Lúdmıla Shýmılovamen birge 1992 jyly Avstrıanyń Feldkırh qalasynda ótken álem chempıonatyna barady. Sý astyndaǵy sporttyń «baǵdarlaý» jattyǵýynda E.Polevaıa birinshi oryndy ıelenedi.
Bul týraly búginde sýasty sportynyń bapkeri bylaı dep eske alady: «Jarysqa keterdiń aldynda bir nárseni sezgendeı birtúrli qyzyq sezimde boldym. Ulttyq Olımpıada komıtetine baryp, el týyn surap aldym. Radıoǵa baryp Qazaqstannyń Ánuranyn jazdyryp aldym. Sóıtsem, bárin durys isteppin. Maıshaferzee kóliniń jaǵasynda turǵan myńdaǵan jankúıer kók júzimen talasa jelbiregen Kók baıraǵymyzdy tamashalady. Sondaı-aq, álem kartasynda jańadan paıda bolǵan memlekettiń Ánuranyn da shamamen 5 mınýt tyńdady. Ol-ol ma, bir jaǵdaıǵa baılanysty uıymdastyrýshylar Ánuranymyzdy eki ret qosyp jiberdi»…
Osylaısha Ekaterına Polevaıa Qazaq Eli sportynyń tarıhyna onyń qurmetine alǵash ret Qazaqstannyń Ánurany shyrqalǵan jáne egemen eldiń alǵashqy álem chempıony atanǵan sportshy retinde endi. Ánuranymyzdy sportshylardyń ózderi jandy daýysta aıtqan jaǵdaılar da bolǵan eken.
– Fransıada oınap júrmiz, – dep bastady sózin Almatynyń «Aısulý» atty hokeıshiler komandasynyń bapkeri A.I.Malsev. – Mach bastalmaı turyp Qazaqstan men Eýropadan kelgen qarsylastardyń Ánurany oınalýy tıis edi. Biraq bizdiń memleketimizdiń Ánurany jazylǵan dısk belgisiz bir sebeptermen «oqylmaı» qoıdy. Ne isterimizdi bilmeı turǵanda, sportshylardyń bireýi qasyma kelip: «Biz Ánurandy jandy daýysta aıtamyz», – dedi.
Meniń ǵana emes, machty kórýge jınalǵan kórermenderdiń de tańdanysynda shek bolmady. Stadıon bizdi úlken qoshemetpen qarsy aldy. Júrekti tebirentken ádemi kórinis boldy. Iaǵnı óz elińniń patrıoty ekenińdi sózben emes, ispen dáleldegen sát edi bul.
Qyzdar Ánurandy jatqa aıtty. Sportshylarymyz jańa Ánurannyń mátinin de jatqa biledi. Óıtkeni, sport áleminde neshe túrli biz kútpegen nárseler oryn alyp jatady. Mysaly, jańa Ánuranymyzdyń mátini barlyq elde joq. Keıbir memleketterde, tipti kórshi turǵan myna Qytaıda da osyndaı jaǵdaıǵa tap bolǵan edik.
Jarysty uıymdastyrýshylar Ánurannyń eski nusqasyn qoıyp jibergen kezder talaı boldy. Sondyqtan bárine daıyn bolý kerek.