Almatydan úsh shaqyrym jerde, İle Alataýynyń eteginde tabıǵat-ananyń syıymen úılesim tapqan «Almaty Resort» shıpajaıy ornalasqan. Kýrort 1960 jyldary qurylǵan. Álemdik standartqa saı, eń ozyq zamanaýı medısınalyq qurylǵylarmen jabdyqtalǵan, dep habarlaıdy almaty-akshamy.kz. 
Prezıdent İs Basqarmasynyń Medısınalyq ortalyǵyna qarasty «Almaty Resort» shıpajaıynyń ashylǵanyna 56 jyldan astam ýaqyt ótti. Shıpajaı teńiz deńgeıinen 1 052 metr bıiktikte ornalasqan. Onyń jalpy aýdany – 21 gektar. Qonaqtardyń aıtýynsha, bul aýmaqty bir kúnde aralap shyǵý múmkin emes. Aýmaǵynda 6500 aǵash bar, Qyzyl kitapqa engizilgeni de jeterlik. Taza aýa men jasyl jelekterde serýendeý adam densaýlyǵyn jaqsartyp, kóńil kúıin jaılandyrady desedi. 
«Almaty Resort» shıpajaıy – «Oqjetpes» emdeý-saýyqtyrý kesheni» aksıonerlik qoǵamynyń fılıaly. Munda qonaqtarǵa eýropalyq standarttar boıynsha daıyndalǵan jaıly bólmeler, tamasha emdeý bazasy, túrli mázirler, sport zaldary jáne taǵy da basqa qyzmetter usynylady. Ǵımarattyń birinshi qabatynda resepshn ornalasqan. Munda saǵat 10.30-dan 12.30-ǵa deıin barlyq demalýshylarǵa fıtoshaı jáne ottegi kokteıli usynylady. Fıtoshaı men shóp shaı ártúrli shópterden jınaqtalyp ázirlenedi. Onyń quramynda gúl jáne qurǵaq japyraqtar, jemis, ósimdik tuqymdary bar. Kelýshiler ǵımarattyń birinshi qabatynda otyryp, tynyǵa alady.
Shıpajaı Kazakh Nomad Resort tujyrmadamasymen jumys isteıdi
Shıpajaıda demalýshylarǵa tańǵy aspen birge qymyz beredi. Qymyz adam denesin qyzdyryp, ımýnıtetin qalyptastyrady desedi. Qyzmetkerlerdiń aıtýynsha, qymyz ishkenderdiń aldaǵy úsh kúnde ishi ótip, adam aǵzasy tazarady eken. Sanatorıı qyzmetkerleri tańerteń qymyz, al keshke aıran beriletinin aıtady. Sebebi, aıran adamnyń qan aınalasyn qalyptandyryp, uıqyńyzdyń qanyp turýyna yqpal etedi. Shıpajaıǵa qymyz Esik qalasynan jetkiziledi eken. Sebebi Esik qalasyndaǵy jylqylar jýsanmen qorektengendikten, súti de adam densaýlyǵyna oń áserin tıgizetin kórinedi. Osy rette, shıpajaı basshylyǵy Kazakh Nomad Resort tujyrymdamasyn qarqyndy engizip jatqanyn atap ótti. Máselen, shıpajaıda ulttyq stılde bezendirilgen sensorlyq bólme bar eken. Munda otyrǵan adamnyń psıhıkalyq jáne moraldyq tynyshtandyryp, júıke júıesin qalpyna keltirýge múmkindik beredi.
3000 m tereńdikten shyǵatyn qaınar bulaq
Jaıaý serýendeýge arnalǵan joldardyń boıyndaǵy alýan túrli jasyl jelek, tamasha orman alqaby tynys joldaryn jaqsartýǵa yqpal etedi. 3000 m tereńdikten shyǵatyn qaınar bulaqtyń mıneraldy sýy da densaýlyqqa tıgizer áseri orasan zor. Tabıǵı ıodtyń 600-750 mkg/dm3 profılaktıkalyq mólsherinde bolýy qaınar sýynyń sapasyn arttyra túsedi. Osy deńgeıde sý 42°S temperatýrada shyǵady. Sý arnaıy qoımada saqtalady jáne klınıka vanalaryna 36°S temperatýrada beriledi.
-SHıpajaıda 135 oryn bar. Jylyna 11500 adam demalady. Onyń ishinde 45%-y aqyly, qalǵan 50%-y qyzmettegi adamdar, joldama arqyly keledi. Demalys orny aýmaǵyndaǵy jasyl jelek D.Qonaevtyń kezinde, 1962 jyldary, arnaıy mamandardyń nusqaýlyǵymen egilgen. Bul aǵashtar tek ádemi kórinis úshin emes, emdik úshin de otyrǵyzylǵan. Adamdardyń densaýlyǵyn jaqsartý maqsatynda jasalǵan. Qazir shıpajaıda 6500 túp aǵash bar, onyń 200-i Qyzyl kitapqa engen. Shıpajaıda Almaty oblysyndaǵy 3000 m tereńdikten shyǵatyn qaınar bulaq bar. Bul sýdyń paıdaly tustary óte kóp, adamnyń tynys joldaryn ashady. Quramynda kóptegen paıdaly dárýmender de bar. Qonaqtar dárigerdiń nusqaýyna saı, derttiń deńgeıine baılanysty balshyqpen emdeledi. Ol Almaty oblysyndaǵy Tuzkól kólinen jetkiziledi, - dedi «Almaty resort» ESK dırektory Buǵybaeva Gúljanat.
Mıneraldy sýdyń quramynda ıod, ftor, brom, marganes, kremnıı qyshqyly sıaqty mańyzdy mıkroelementter bar. Sý – as qorytý júıesiniń, asqazan-ishek joldarynyń jáne basqa da organdardyń dertterin emdeýde taptyrmas shıpa. Sonymen qatar, ol túrli prosedýralarǵa, ıaǵnı mıneraldy vana, gınekologıalyq, ishek jáne aýyz qýysynyń aýrýlary men ıngalásıa úshin qoldanylady. Mıneraldy sýdy paıdalanýdan basqa, munda balshyqpen emdeý prosedýralary bar.
Medısınalyq blok zamanaýı qurylǵylarmen jabdyqtalǵan
Bul jerdiń klımaty kontınenttik, temperatýrasy erekshe, jazda bir-eki gradýsqa tómen jáne qysta bir-eki gradýsqa jylyraq. Otteginiń atmosferalyq jáne parsıaldyq qysymy teńiz deńgeıine qaraǵanda tómen. Shıpajaıdyń medısınalyq blogynda 99 maman bar. Onyń ishinde 27-si – dáriger, 46-sy – orta medısınalyq personal, 18-i – kishi medısınalyq personal. Medısınalyq blok zamanaýı qurylǵylarmen jabdyqtalǵan. Sanatorıı dárigerleri pasıenttiń dıagnozyna sáıkes, emdeý josparyn ázirleıdi. Bul jerde kardıolog, terapevt, nevropatolog, endokrınolog, dıetolog, fızıoterapevt, ýrolog, oftalmolog, stomatolog sıaqty medısına mamandary jumys isteıdi. Aǵzadaǵy ártúrli patologıalardyń damý qaýpin anyqtaý úshin «Medskaner BIORS» apparaty qoldanylady. Bul qurylǵydaǵy Velness (densaýlyq) baǵdarlamalyq kesheniniń kómegimen 10 túrli dıagnostıkadan ótýge bolady. Sanatorıı dárigerleri pasıenttiń dıagnozyna sáıkes, emdeý josparyn ázirleıdi. 
-Fýnksıonaldyq dıagnostıkaǵa keletin bolsaq, bizde barlyq organdardyń, býyndardyń, jumsaq tinderdiń últradybystyq zertteýi, Holter boıynsha EKG-niń táýliktik monıtorıńi, kardıogram, spırografıa júrgiziledi. Sondaı-aq bizdiń zerthana barlyq zamanaýı standarttarǵa saı keledi. Biz serologıalyq, bıohımıalyq, ımmýnofermenttik taldaýlar (IFA), check-up (chek ap) jasaımyz. Iaǵnı, bizdiń keshennen búkil zertteýler men keńesterdi alýǵa tolyq múmkindik bar, – dedi Saltanat Beısembaeva.
Meıramhanalar 340 adamǵa arnalǵan
Shıpajaıdyń aýmaǵy keń bolýyna baılanysty, munda úsh úlken meıramhana bar. Solardyń biri kıiz úı túrinde jasalyp, ulttyq naqyshtaǵy elementtermen bezendirilgen. Buǵan qosa, munda mýzykalyq aspaptar da qoıylǵan. Al ekinshi meıramhanada robot daıashy bar. Ol adamdarǵa taǵam tasyp, týǵan kúnderimen quttyqtaı alady. Meıramhanalar 340 adamǵa arnalǵan. Qonaqtar ulttyq taǵamdarmen qatar, sheteldik tamaqtardyń da dámin tata alady. As mázirine tek aspaz ǵana emes, shıpajaı dırektory Gúljanat Buǵybaeva da jaýapty.
-Biz Ulttyq taǵamdar kúnin engizdik. Juma kúnderi tańǵy astan bastap, bizde et, kespe, qýyrdaq, baýyrsaq sıaqty ulttyq taǵamdar, sondaı-aq maısók, taǵy basqa dámdi desertter daıyndalady. Sonymen qatar, sársenbide biz ózbek jáne ıtalán asqanasynyń taǵamdaryn ázirleımiz. Jalpy, bizde kún saıyn mázir ózgerip turady jáne olar bir-birine uqsamaıdy, qaıtalanbaıdy. Munyń bári bizdiń kelýshilerimiz úshin jasalady, - dedi Gúljanat Buǵybaeva.
Aldymen em, sosyn demalý úshin Astanadan keldim. Ózim 37 jyl memlekettik qyzmette istedim. Onyń 25 jylyn sot tóreligine arnadym. Osy shıpajaıǵa bes jyldan beri turaqty túrde kelip turamyn. Shıpajaıdaǵy medbıkeleriniń qyzmetine erekshe rızamyn. Jaǵdaıyńdy bilip, kóńilge demeý berip turady. Barlyǵy óz ornynda, mindetterin múltiksiz atqarady. Dárigerler bilikti, medbıkeler meıirban. Emdelip, demalyp, densaýlyǵyńdy jaqsarta alasyń. Jalpy, ózim júregimniń aqaýyna, qant dıabetine baılanysty dárigerdiń esebinde turmyn. Osy dertterime em alý úshin osy jaqqa kelemin. Júrek aýyrǵanan keıin taza aýa, kóńilge tynyshtyq kerek degendeı. Kelgenime bir aptaǵa jýyqtady. Osy ýaqyttyń ishinde densaýlyǵymdaǵy oń ózgerister sezilip jatyr. Kóńil kóterilip, erekshe bir kúıge enip jatqanymdy jasyrmaımyn, - deıdi demalýshy Baıdýla Qoshanov.
