Qazaqstan, Ortalyq Azıa jáne TMD elderinde alǵash ret «Eurasian Journal of Physics and Functional Materials» ǵylymı jýrnaly Digital Commons Elsevier platformasynda shyǵaryla bastady.
Elsevier álemdegi eń iri ǵylymı baspalardyń biri jáne dúnıe júzindegi ǵylymı jýrnaldardyń barlyq maqalalarynyń tórtten birin shyǵarady, dep habarlaıdy Almaty-akshamy.kz Ǵylym jáne joǵary bilim mınıstrligine silteme jasap.
«Eurasian Journal of Physics and Functional Materials» jýrnaly Eýrazıa ulttyq ýnıversıtetinde 2017 jyldan bastap aǵylshyn tilinde shyǵarylady. Ǵylymı basylymnyń barlyq maqalalary Scopus halyqaralyq ǵylymı derekter bazasyna da engizilgen. Jýrnal ıadrolyq fızıka, joǵary energıa fızıkasy, balamaly jáne sýtegi energetıkasy, t.b. saladaǵy ǵylymı zertteýlerdiń nátıjeleri týraly materıaldardy qamtıdy.
Jýrnaldyń halyqaralyq redaksıa alqasynyń quramyna Qazaqstan, Reseı, AQSH, Fransıa, Japonıa, Fınlándıa, Shvesıa, Italıa, Ózbekstan, Anglıa ǵalymdary, sondaı-aq CERN jáne Birikken ıadrolyq zertteýler ınstıtýty sıaqty álemdik deńgeıdegi ǵylymı uıymdar kiredi.
«Elsevier kompanıasy jýrnaldy bazaǵa qosý jáne elektrondyq nusqasyn shyǵarý týraly bizge usynyspen ózderi shyqty. Elsevier platformasynda «Eurasian Journal of Physics and Functional Materials» jýrnalynyń jarıalanýy jýrnaldyń ǵana emes, Qazaqstannyń búkil ǵylymı qoǵamdastyǵynyń damýy úshin jańa perspektıvalar ashady. Bul L.Gýmılev atyndaǵy EUÝ-da jáne Qazaqstanda júrgizilip jatqan ǵylymı zertteýler sapasynyń halyqaralyq deńgeıin moıyndaý», - dep atap ótti jýrnaldyń bas redaktory, EUÝ «Eýrazıalyq fızıka-energetıkalyq zertteýler jáne joǵary tehnologıalar ınstıtýty» ǴZI dırektory Qaırat Kúterbekov.