QR Densaýlyq saqtaý mınıstrligi eldegi alǵashqy Balalarǵa onkologıalyq jáne gematologıalyq kómekti uıymdastyrý standartyn ázirlep, bekitti.
Densaýlyq saqtaý mınıstriniń buıryǵymen bekitilgen qujat onkologıalyq jáne gematologıalyq aýrýlary bar balalardy dıagnostıkalaý men emdeýdiń sapasyn medısınalyq kómektiń barlyq deńgeılerinde — bastaýyshtan mamandandyrylǵanǵa deıin jaqsartýǵa baǵyttalǵan.
Búginde Qazaqstanda dıspanserlik esepte qaterli isikterdiń remısıasynda 4 000-ǵa jýyq bala bar jáne jyl saıyn 600-ge deıin jańa jaǵdaı anyqtalady.
Balalar onkologıasy men gematologıasynyń aýrýlary erekshe tásildi qajet etedi, óıtkeni olar qurylymy, nátıjeleri jáne emdeý ádisteri boıynsha eresekterden erekshelenedi. Jańa Standart kishkentaı pasıentterge keshendi jáne tıimdi kómek kórsetý úshin barlyq talaptar men usynymdardy birinshi ret bir qujatqa biriktiredi.
Standart ımmýnogıstohımıa jáne ımmýnofenotıpteý sıaqty dıagnostıkanyń ozyq ádisterin, sondaı-aq joǵary dozaly hımıoterapıany, aǵzany saqtaıtyn operasıalardy jáne gemopoezdik diń jasýshalaryn transplantattaýdyń barlyq túrlerin qoldanýdy kózdeıdi. Bul aýrýlardy tezirek jáne dál anyqtaýǵa jáne tıimdi emdeýge múmkindik beredi.
Balalardy dıagnostıkalaý jáne emdeý onkolog -mamandardyń, hırýrgtardyń, reanımatologtardyń jáne basqa da dárigerlerdiń mýltıdısıplınalyq komandanyń qatysýymen kópbeıindi balalar stasıonarlarynda júzege asyrylatyn mindetti kóp deńgeıli tásil alǵash ret engizildi. Bul árbir balaǵa jan-jaqty medısınalyq kómek kórsetedi.
Standartta balalar emdeletin medısınalyq uıymdardy jaraqtandyrýǵa, sondaı-aq baqylaý kólemi men merzimderine naqty talaptar belgilengen. Osy talaptardy engizý búkil el boıynsha emdeý sapasynyń birdeı joǵary deńgeıin qamtamasyz etýge kómektesedi. Sondaı-aq, aýrýhanada bolý merzimin qysqartý jáne úıge jaqyn emdeý múmkindigi sıaqty otbasylarǵa júktemeni azaıtý sharalary kózdelgen.
Jańa standartty iske asyrý balalar onkologıasy men gematologıasy salasyndaǵy otandyq densaýlyq saqtaý jetistikterin kúsheıtýge jáne nyǵaıtýǵa múmkindik beredi.