Forýmǵa QR Prezıdenttigine kandıdattyń 2,5 myńǵa jýyq senimdi ókili qatysty. Olar – «AMANAT», «Aq jol», Qazaqstan Halyq partıasy syndy saıası partıalardyń jáne Halyqtyq koalısıaǵa kirgen 30-dan astam respýblıkalyq qoǵamdyq birlestik músheleri.
Jaqtastar forýmy – kandıdattyń saılaýaldy naýqanyndaǵy sońǵy is-shara. Qasym-Jomart Toqaev forýmda sóılegen sózinde qoldaý bildirgen barshaǵa rızashylyǵyn bildirdi.
«Saılaýǵa daıyndyq jumystary aıaqtaldy. Sizder aýqymdy jumys atqardyńyzdar. Aldaǵy jeksenbide halqymyz eldiń bolashaǵyn aıqyndaıdy. Bul – memleketimiz úshin óte mańyzdy naýqan. Jurtymyz osy saılaýǵa aıryqsha mán berip otyr. Onyń óz ereksheligi bar. Saılaý naýqany úsh aıǵa jýyq júrgizildi. Qoǵam ókilderi qyzý pikirtalasqa tústi. Ártúrli talqylaý boldy. Sonyń barysynda ıgi bastamalar jáne tyń usynystar aıtyldy», - dedi Qasym-Jomart Toqaev.
İs-shara barysynda Respýblıkalyq qoǵamdyq shtabtyń basshysy Erlan Qoshanov, «Teń múmkindikter álemi» qoǵamdyq qorynyń negizin qalaýshy Nurgúl Uljekova, zaýyt sheberi Maqsat Tohanov, kardıolog-dáriger Gúlnar Qambarova, «Sensitive» estimeıtin bıshiler teatrynyń solısi Aınur Saınova, Qostanaı oblysynan kelgen volonter Iýrıı Presnov jáne «Ulttyq rýh» qoǵamdyq birlestiginiń tóraǵasy Aıat Súgirbaı sóz sóıledi.
Jalpy, úgit-nasıhat naýqany kezinde Qasym-Jomart Toqaevtyń jaqtastary 42 qala men 5000-nan astam aýyldy aralady. Olar ótkizgen 24 myń úgit-nasıhat is-sharasyna 3 mıllıonǵa jýyq saılaýshy qatysty. Kezdesýler barysynda azamattardan 40 myńnan astam usynys pen tilek jınaldy.