Mádenı-rýhanı is-shara Dına Nurpeıisovanyń eskertkishine gúl shoqtaryn qoıýmen bastaldy.
Aldymen «Altyn dombyra» balalar mektebiniń shákirtteri men qaladaǵy №37 mektep-lıseıdiń oqýshylary óner kórsetti, dep habarlaıdy Almaty-akshamy.kz QazAqparatqa silteme jasap.
QR eńbek sińirgen qaıratkerleri, kásibı kúıshi-dombyrashylar Turar Álipbaev pen Anar Muzdahanova birneshe kúı tartyp, kórermenderdiń qoshemetine bólendi. Jınalǵandar aldynda «Kúı anasy» respýblıkalyq qorynyń jetekshisi Tólegen Qýanyshev pen Nur-Sultan qalasy qoǵamdyq keńesiniń tóraǵasy Zýlfýhar Gaıpov sóz sóıledi.
«Ótken jyly Ulttyq dombyra kúni qarsańynda kúı anasy atanǵan Dına Nurpeıisovanyń eskertkishi ashylyp edi. Saltanatty jıynda azamattar «Osy jerdi bolashaqta óner ortalyǵyna aınaldyryp, týrısik klaster uıymdastyraıyq» degen pikirlerin bildirgen. Bizder qala ákimi Altaı Kólginovke usynys jasap, sonyń nátıjesinde osy alań bolashaqta qazaq halqynyń kúıshileri men kúıshi-kompozıtorlar aleıasy atanatyn boldy. Halyqqa, sonyń ishinde jastarǵa tól ónerimiz – kúıdi dáripteý men nasıhattaý maqsatynda mádenı is-sharalardy usynǵan bolatyn. Mine, búgin sol usynysty júzege asyrýdyń sáti túsip tur», - dedi T.Qýanyshev.
Baǵdarlamaǵa sáıkes Kúı jármeńkesinde jurtshylyq ishinen óz ónerin kórsetemin degen adamdar ortaǵa shaqyryldy. QR eńbek sińirgen qaıratkerleri, kúıshi, ustazdar Aıtjan Toqtaǵan men Orynbaı Dúısen qazylyq jasady. Saıysqa onnan astam úmitker qatysty. Sonyń ishinde Nargız Qasymova jeńimpaz atanyp, úkili dombyraǵa ıe boldy.
Kúı jármeńkesin Nur-Sultan qalalyq qoǵamdyq keńesi, qalalyq jastar saıasaty basqarmasy jáne «Kúı anasy» respýblıkalyq qory uıymdastyrdy.
