«Nur-Sultan – Semeı» baǵyty boıynsha áýe kemesi ushyp shyqty
Búgin, Qazaqstan Respýblıkasynyń Tuńǵysh Prezıdenti kúni, «Nursultan Nazarbaev Halyqaralyq áýejaıy» AQ-na 90 jyl toldy. Bul kúni, 1931 jylǵy 1 jeltoqsanda, Semeı men Aqmola arasynda turaqty áýe qatynasy bastaldy (Kásiporynnyń qurylǵan kúni). Osy kúnge oraı, elorda áýejaıynda termınaldardyń qurylys tarıhynan syr shertetin sırek kezdesetin muraǵattyq fotosýretter kórsetildi, dep habarlaıdy Almaty-akshamy.kz áýejaıdyń saıtyna silteme jasap.
Búgin, 90 jyldan keıin, tańǵy reıspen elordadan «Nur-Sultan – Semeı» baǵyty boıynsha áýe kemesi ushyp shyqty. Jolaýshylar saltanatty jaǵdaıda orkestrdiń áýenimen tirkeýden ótti. Sondaı-aq mereıtoılyq is-sharalar aıasynda Halyk Bank-pen birlesip, áýejaı dızaınymen taqyryptyq bank kartasy shyǵaryldy. Búginde Nursultan Nazarbaev halyqaralyq áýejaıy – elimizdegi eń iri áýejaılardyń biri. Elordanyń áýe aılaǵy Ortalyq Azıa elderiniń áýejaılary arasynda jolaýshylar aǵyny men júk tasymalynyń kóptigine baılanysty ekinshi orynda, sondaı-aq postkeńestik keńistiktegi áýejaılar arasynda 12-shi orynda. Munda qabyldanatyn áýe kemeleriniń eń joǵary túrleri: Boıng B-747-800, Rýslan AN-124 jáne tómengi sanattaǵy ushaqtar.
Búgingi tańda áýejaıdyń álemdik ozyq tájirıbelerge sáıkes, jolaýshylarǵa da, avıakompanıalarǵa da qyzmet kórsetý úshin barlyq qajetti ınfraqurylymy bar. Sıfrlyq múmkindikterdi damytýdyń arqasynda áýejaı ázirlep shyqqan NQZ qosymshasy arqyly jolaýshylar onlaın tirkeýden óte alady, reısterdi baqylaı alady, áýejaı qyzmetterine aqy tóleı alady. Áýe kemelerine otyn quıýdyń biregeı júıesi óz kezeginde ushý aldyndaǵy rásimderge ketetin ýaqytty qysqartýǵa jáne avıakompanıalarǵa jedel qyzmet kórsetýge múmkindik beredi. Elorda áýejaıyn damytý IATA jáne IKAO halyqaralyq standarttaryna sáıkes júrgiziledi. Áýejaıdyń ushý-qoný jolaǵy - Ortalyq Azıadaǵy eń úzdik jolaqtardyń biri. Ol İİİA IKAO sanatyna sáıkes keledi jáne kez kelgen aýa raıynda áýe kemelerin qabyldaýǵa jáne shyǵarýǵa múmkindik beredi. Elorda áýejaıy Nur-Sultan qalasynyń qonaqtary men jolaýshylary úshin qolaıly jaǵdaı jasaýda barlyq múmkindikti qoldanady.