Túrli sala mamandary qala ákiminiń alǵys hatymen marapattaldy
Tuńǵysh Prezıdent kúnine oraı «El tiregi – Elbasy» ataýymen Shymkent qalasynda saltanatty jıyn ótti, dep habarlaıdy Almaty-akshamy.kz Aikyn.kz-ke silteme jasap.
Merekelik keshte ult Kóshbasshysynyń elimizdiń egemendik alǵan jyldarynan bastap, memlekettiń damýy men órkendeýi jolyndaǵy eren eńbegi jaıly «Elbasy joly» beınefılmi kórsetildi. Ekonomıkany nyǵaıtyp, ishki kelisimdi bekemdep, ózge eldermen dıplomatıalyq baılanystar ornatýdaǵy Elbasynyń iskerligi men kemeńgerligi erekshe ataldy.
Merekege oraı ótkizilgen saltanatty jıynda Shymkent qalasynyń damýyna úles qosyp kele jatqan túrli sala mamandary qala ákiminiń alǵys hatymen marapattaldy. Olardyń ishinde kóz janarynan aıyrylyp, zaǵıp bolyp qalǵanyna qaramastan, aýla sypyrýshy bolyp jumys isteıtin Nurtileý Janalıev te bar. Ol shahardaǵy komýnaldyq tazalyq mekemesinde 11 jyldan beri úzdiksiz eńbek etip keledi. Jigerli jan mereke qarsańynda erekshe qýanyshqa bólengenin aıtty.
– Tazalyqty súıemin. Sondyqtan da aýla sypyrýshy bolyp eńbek etemin. Qalanyń tazalyǵyna úles qosyp kelemin. Men úshin búgin úlken qýanysh. Bul – meniń alǵashqy marapatym, – deıdi komýnaldyq tazalyq mekemesiniń jumysshysy Nurtileý Janalıev.
Ataýly keshke estrada juldyzdary da qatysyp, eldik jolyna arnalǵan ánderdi oryndady. Kesh sońynda «Jas Ulan» mektebiniń 100 sarbazy Elbasynyń sózine jazylǵan «Elim meniń» ánin shyrqady.