Búgin Almaty qalasy D.A.Qonaev atyndaǵy kolejde Quqyqtaný mamandyǵynyń 2 kýrsy 1-top stýdentteriniń uıymdastyrýymen «Elimniń baqytyn terbegen Táýelsizdik» taqyrybynda merekelik is-shara ótkizildi.
16 jeltoqsan – Qazaqstan Respýblıkasynyń Táýelsizdik kúni! Bul kún – halqymyzdyń ǵasyrlar boıy ańsaǵan armanynyń oryndalǵan kúni, erkindik pen bostandyqqa qol jetkizgen kúni! Táýelsizdik kúni – elimizdiń barlyq azamattary úshin orny erekshe mereke dep bilemiz, sebebi, osynaý júrekjardy qýanyshqa toly kúndi ata-babalarymyz ǵasyrlar boıy armandap, kútýmen ótkeni bárimizge málim. Al 1986 jylǵy «Jeltoqsan» oqıǵasy halyqtyń esinde máńgi saqtalady. 16 jeltoqsanda qazaq jastary Ortalyq alańǵa shyǵyp, Qazaqstannyń táýelsizdigin talap etýdiń nátıjesinde 1991 jyly 16 jeltoqsanda Qazaqstan Respýblıksynyń Táýelsizdigi týraly Zańnyń qabyldanǵany aıtyldy.
Merekelik shara Memlekettik Ánuranymen bastalyp, Jeltoqsan qurbandaryn 1 mınýt únsizdikpen eske alyp, qurmet kórsetildi. Sharaǵa qatysqan stýdentter qazaq eliniń tarıhy men qalyptasý kezeńderi, ult-azattyq kóterilister men onyń zardaby, halqymyzdyń táýelsizdik jolyndaǵy kúresteri men qol jetkizgen jetistikteri týraly málimetter aldy. Táýelsizdigimiz jolynda 1986 jyly 16 jeltoqsanda Ortalyq alańǵa shyqqan qazaq jastarynyń arasynda bolǵan, búgingi kúni ortamyzda júrgen qaısar rýhty qazaqtyń keshegi órimdeı qyz-jigitteri búginde qurmetti ustazdar qatarynda qyzmet atqaryp júr. Atalǵan sharaǵa kolej ustazdaryn qatystyrý – shákirtterine Otanǵa degen súıispenshilik, óz eliniń tarıhy men taǵdyryna qatysty sezimin oıatyp, jastardyń azamattyq jáne patrıottyq sanasyn qalyptastyrýdy, ustazǵa degen qurmetin arttyrý maqsatynda josparlanǵan.
Jeltoqsan oqıǵasyna qatysýshylar – kolej dırektory R.Ch. Býlekbaeva, zańger-ustaz A.N. Jumabaı jáne tájirıbeli ustaz, tarıh pániniń aǵa oqytýshysy J.B. Akımbaeva bul sharaǵa arnaıy shaqyryldy. Janyn muzdatqan aıazdy kúnderdiń áserli estelikterimen bólisken Ustazdar janaryna jas alyp kóńilderi tolqydy. Shákirtterin bilim berýmen qatar patrıottyq rýhta tárbıeleı otyryp, jastarǵa jiger beretin tilekterin aıtty.
Sharany uıymdastyrý barysynda jarıalanǵan baıqaýlardyń nátıjeleri aıtylyp, úzdik dep tanylǵan stýdentter «Madaqtama»,«Alǵys hattarmen» marapattaldy. Sýretter men qolóner buıymdarynan kórme uıymdastyrylyp, patrıottyq ánder men mánerlep oqý jeńimpazdary anyqtalyp, ónerlerin kórermenderge tartý etti. Qazaqstannyń Táýelsizdigine jastardyń jaýapkershilik sezimin qalyptastyrýǵa baǵyttalǵan tárbıelik sharalar ulttyq mádenıetti, tarıhty jáne batyrlar erligin qadirleı otyryp, eliniń bolashaǵy úshin belsendi, adal azamattar bolyp ósetinine senimdimiz.