XII-shi «Bastaý» kınofestıvaliniń jeńimpazdardy anyqtaldy
14 jeltoqsanda Almatyda XII Halyqaralyq «Bastaý» stýdenttik jáne debúttik fılmder kınofestıvali óz máresine jetti, dep habarlaıdy aqshamnews.kz.
Ulttyq kınony qoldaý ortalyǵy baspasóz qyzmetiniń habarlaýynsha, sharanyń jabylý saltanaty AlmaU-daǵy Atrium Grand Hall zalynda ótti, onda BASTAU SHORTS baıqaý baǵdarlamasynyń jeńimpazdary anyqtaldy.
Úzdik qysqametrajdy fılm nomınasıasynda bas syılyqty polshalyq rejıser Domınık Mıreskııdiń «Son of Happiness» kartınasy jeńip aldy. Eń úzdik anımasıalyq týyndy bolyp ýkraınalyq «Obirých» fılmi atandy. Al derekti fılmder seksıasynda bas júldeni otandyq «Menin Terminatorsham» kartınasy utty. Sonymen birge qazylar alqasy Slovakıadan kelgen «Kásibı ata-ana» atty týyndyny erekshe atap ótti.
«Kınoda eń qıyny – ol bastaý. Sol sebepti bizdiń basty maqsatymyz osy daryndy jastardyń alǵashqy qadamynda qoldaý kórsetý, damytý, olardy tanytý. Ol úlken jumys. Uıymdastyrý qıynshylyqtaryna, qarajattyń joqtyǵyna qaramastan biz bıyl festıváldi ózimiz ótkizdik. Búkil seriktester men qoldaýshylarǵa myń alǵys», - dep atap ótti «Bastaý» prezıdenti Sergeı Ázimov.
Dástúrli túrde festıválde stýdenttik qazylar alqasy jumys istedi, olar da óz jeńimpazdaryn tańdady. Jastardyń tańdaýy Polshadan kelgen taǵy bir kartına - Aleksandr Pakýlskııdiń Hi grandpa fılmi. Stýdentter sonymen qatar debútant Mahambet Myrzanyń «Qarasha» atty týyndysyn da erekshe atap ótti.
«Bul meniń debúttik jumysym. Birinshi kýrsta túsirgem. Qazir óner akademıasynda ekinshi kýrsta oqımyn. Bul meniń úshinshi festıvalim. Máskeýde, jáne kúni keshe Túrkıada boldym. Biraq alǵashqy júldemdi Qazaqstanda alyp otyrmyn. Bul men úshin úlken mártebe. Meniń fılmim – aýylda adal eńbekpen ómir súretin ata men áje týraly». – deıdi debútant, tanymal tıktoker Mahambet Myrza.
Sonymen qatar, Túrkıanyń «Vaziyet» atty týyndysy NETPAK – Azıa kınosyn ilgeriletý jónindegi dúnıejúzilik uıymnyń júldesin jeńip aldy. Al festıvál prezıdentiniń «Jarqyn debút» úshin arnaıy júldesimen otandyq rejıser Alına Mustafına «Onyń ákesine, meniń arǵy atama, onyń arǵy atasyna pirándik» derekti fılmi úshin marapattaldy.
Sondaı-aq, saltanatty rásimde rejıserlerge arnalǵan Almaty Film Lab sheberhanasynyń ekinshi pıchıng jeńimpazdarynyń esimderi belgili boldy. Olar óz jobalaryn odan ári óndirý úshin qarjylyq qoldaý alady. Jeńipmazdardyń qataryna «Aıaýlym» jobasymen Mıra Abdrahmanova jáne «Toıymsyz adamdar» týyndysymen Dastan Túsipbekov qosyldy.
Saltanatty shara byltyrǵy pıchıng jeńimpazdarynyń úsh qysqametrajdy fılmin kórsetilimimen aıaqtaldy.
Esterińizge sala ketsek, bıyl konkýrstyq baǵdarlamaǵa 500-den astam ótinim kelip tústi, olardyń ishinen 28 eldiń 43 kartınasy irikteldi. Sondaı-aq, festıváldiń ashylý saltanatynda otandyq kınoındýstrıanyń damýyna qosqan úlesi úshin aqsaqaldarymyz Asanáli Áshimov, Rahman Álshanov jáne Qanat Ábishevke erekshe syılyqtar tabystaldy. Festıváldi dástúrli túrde Almaty qalasy ákimdiginiń qoldaýymen Tanaris Production jáne A-Team kınokompanıalary uıymdastyrdy.