Memlekettik rámizder – eldiń ulttyq bolmysyn, derbestigi men táýelsizdigin búkil álemge tanytatyn belgi.
Qazaqstannyń tuńǵysh rámizderi – Tý men Eltańba 1992 jyldyń 4 maýsymynda qabyldandy. Al Ánuran mátini sol jyldyń 11 jeltoqsanynda bekitildi. Bıyl rámizderge - 32 jyl, dep habarlaıdy Almaty-akshamy.kz.
Táýelsizdik kúni qarsańynda nazarlaryńyzǵa Memlekettik rámizder týraly qyzyqty derekterdi usynamyz.
1. Eltańba kórinisi Qazaqstan azamatynyń kez kelgen qujatynda bolady. Týý týraly kýálikten bastap zeınetaqy kitapshasyna deıin Eltańbanyń belgisi qoldanylady.
2. Tý únemi oń jaqqa qaraı jelbireýi kerek.
3. 1992 jyly qabyldanǵan Ánuran 750 joba ishinen tańdalyp alynǵan.
4. Memlekettik mekeme mańdaıshalarynda Tý mindetti túrde bolýy kerek.
5. Qazaqstan Respýblıkasynyń zańnamalar jınaǵynda rámizderge arnaıy 3 bap berilgen.
6. Qazirgi Ánuranymyz zańdy túrde 2006 jyly 7 qańtarda qabyldandy. Jańa Ánuran birinshi ret sol jyly 11 qańtarda Tuńǵysh Prezıdent N.Nazarbaevty saltanatty ulyqtaý rásiminde oryndaldy.
7. Qazaqstandaǵy eń úlken tý elordadaǵy «Atameken» etnomemorıaldyq keshenindegi Memlekettik rámizder alańynda ornalasqan. Bıiktigi – 111 metr. Keshen 2009 jyly salynǵan.
8. 1994 jyly 1 shildede Talǵat Musabaev tuńǵysh ret qazaqtyń Týyn ǵaryshqa apardy.
9. Monblan shyńynda (4 810 m), Pamır taýynyń Lenın shyńynda (7 134 m) jáne Everest shyńynda (8 800 m) elimizdiń Týy jelbirep, Ánuranymyz shyrqaldy.
10. 2015 jyly ǵaryshker Aıdyn Aıymbetovtiń ǵaryshqa sapary kezinde Qazaqstannyń Týy Jerdi 150 ret aınalyp ushty.