Kólik mınıstri Nurlan Saýranbaevtyń málimdeýinshe, jańa temirjol jelileri salynady, dep habarlaıdy aqshamnews.kz
«Temirjol jelisiniń jalpy paıdalaný uzyndyǵy 16 myń km. Tozý deńgeıi 57 paıyzdy quraıdy. Bul poıyzdardyń qozǵalys jyldamdyǵy men qaýipsizdigine áser etedi. Infraqurylym múmkindikteri tolyq sheginde jumys istep tur», - deıdi Saýranbaev úkimet otyrysynda.
Onyń aıtýynsha, osy problemalardy sheshý úshin 2029 jylǵa deıin 5 myń shaqyrym jańa jol salynyp, modernızasıadan ótip jatyr. Sonymen qatar, 11 myń shaqyrym jol jóndelýde.
«Qazir 5 joba boıynsha jańa qurylys jumystary júrip jatyr: olar «Dostyq – Moıynty», «Almaty aınalma temirjoly», «Darbaza – Maqtaaral», «Moıynty – Qyzyljar» jáne «Baqty – Aıagóz». Osy jyly, merziminen buryn, eki iri joba aıaqtalady: olar «Dostyq – Moıynty» ýchaskesi men Almaty aınalma temirjoly. Kelesi jyly «Moıynty – Qyzyljar» jáne «Darbaza – Maqtaaral» jańa temirjoldary iske qosylady»,- dedi mınıstr.
Buǵan qosa bıyl 3 myń km temirjol ýchaskelerinde tolyq modernızasıa bastalǵan.
«Bul jumystar jańa joldardy salýmen teń. Mysaly, «Qyzyljar – Sekseýil» ýchaskesiniń ótkizý qabileti 8 poıyzdan 25 poıyzǵa deıin, al «Qandyaǵash – Tobyl» 7-den 25-ke deıin kóteriledi. Búginde atalǵan jobalar Qazaqstannyń temirjol karkasyn tolyǵymen qalyptastyrady dep aıtýǵa bolady», - dedi vedomstvo basshysy.