Kórshi elden keledi dep boljanǵan 10,3 mlrd tekshe metr sýdyń ornyna bıyl 7,3 mlrd tekshe metr sý jetkizilýi múmkin.
Túrkistan oblysyna jumys saparymen barǵan QR Ekologıa, geologıa jáne tabıǵı resýrstar vıse-mınıstri Serik Qojanıazov elimizdiń ońtústik óńirlerinde aǵyn sý tapshylyǵy bolýy múmkin ekenin atap ótti, dep habarlaıdy Almaty-akshamy.kz QazAqparatqa silteme jasap.
Maqtaaral jáne Jetisaı aýdandaryndaǵy sý nysandarynyń jaı-kúıimen tanysqan vıse-mınıstr kórshiles eldegi Toqtaǵul qoımasynda sýdyń qory josparlaǵannan 1,6 mlrd tekshe metrge kem jınalǵanyn jetkizdi. Elimizge keledi dep boljanǵan 10,3 mlrd tekshe metr sýdyń ornyna bıyl 7,3 mlrd tekshe metr sý jetkizilýi múmkin ekenin aıtyp ótti. Saldarynan Shardara men Kóksaraı sý qoımalaryndaǵy sýdyń kólemi byltyrǵyǵa qaraǵanda 1 mlrd tekshe metrge az jınalyp, Kóksaraı sý qoımasynda sýdyń mólsheri tym tómen bolady degen boljam bar. Osy qıyndyqtan shyǵý joldaryn talqylaý kezinde Serik Qojanıazov dıqandarǵa kóktemgi jaýyn shashyn az bolsa aǵyn sýdy az qajet etetin daqyldarǵa kóshý kerektigin eskertti.
«Bıyl osy Kóksaraısyz shyǵatyn amaldar tabýymyz kerek. Mindetti túrde qosymsha shara, oǵan jyldaǵy nasosymyz bar, kezekke turatynymyz bar. Sýdy kóp talap etetin daqyldardy egýdi azaıtý máselesi bar degendeı. Eki aýdannyń tórt myńdaı gektar jerinde kúrish egiledi. Bıyl osy kúrishti meılinshe ekpeý kerek. Óıtkeni maqta sıaqty basqa daqyldarǵa sý jetpeıdi. Sosyn taǵy bir qıyndyq Kóksaraıdyń mańynda 2,5 myń gektar jerge Arys aýdanynyń sharýalary daqyl egedi. Olarǵa bıyl egin egýge jaǵdaı bolmaıdy. Sol sebepti sondaı qıynshylyqtar bolady. Degenmen jaǵdaı Úkimettiń jiti baqylaýyna alynyp, kórshiles eldermen kelissózder júrgiziledi», - dedi Serik Qojanıazov.
Tyǵyryqtan shyǵýdyń joldaryn qarastyrǵan mamandar Kóksaraıda sý bolmasa, bir ǵana Shardaranyń sýy Túrkistan men Qyzylorda oblystaryna jetpeıdi dep otyr. Sondyqtan aǵyn sý máselesi boıynsha óńirdegi jaǵdaıdy zerdelep, sý tapshylyǵyna baılanysty qolǵa alynatyn jumystardy pysyqtap ótti. Vıse-mınıstr aǵyn sý jetkizý aldymyzdaǵy aqpan jáne naýryz aılary qarly ári jańbyrly bolsa, jaǵdaı rettelýi múmkin ekenin de atap ótti.
«Degenmen biz bıyl meılinshe sýdy az qajet etetin kókónister men daqyldardy egip, sýdy paıdalaný tártibin retteýimiz qajet. İssaparymyzda oblys, aýdan, qala ákimdikterimen osy másele boıynsha keńesip, tyǵyryqtan shyǵatyn joldardy qarastyrdyq. Tıisti nusqaýlar berildi. Syrdarıa ózeniniń sýy boıynsha úkimetaralyq deńgeıde qaralatyn da máseleler bar», – dedi Serik Qojanıazov.
Aıta keteıik, Túrkistan oblysynda 44 sý qoımasy, 105 magıstraldi kanal, 1699 sharýashylyqaralyq jáne sharýashylyqishilik arna, 1200-deı tik drenajdy uńǵyma bar. Qazirgi tańda mınıstrlik pen oblys ákimdigi tarapynan óńirde sý únemdeý tehnologıalaryn qoldaný jáne ony jappaı engizý boıynsha uıymdastyrý, túsindirme jumystary júrgizilip jatyr.