Qazaqstannyń ulttyq qurama komandasyna Qasym-Jomart Toqaev qol bulǵap, qoldaý kórsetti.
Memleket basshysy Beıjińdegi «Qus uıasy» ulttyq stadıonynda ótken XXIV Qysqy Olımpıada oıyndarynyń ashylý saltanatyna qatysty, dep habarlaıdy Almaty-akshamy.kz Aqordanyń resmı saıtyna silteme jasap.
Saltanatty ashylý rásimine Qazaqstan Prezıdenti Qasym-Jomart Toqaev jáne QHR Tóraǵasy Sı Szınpınmen qatar Argentına, Mysyr, Qyrǵyzstan, Polsha, Reseı, Sıngapýr, Serbıa, Tájikstan, Túrikmenstan, Ózbekstan, Ekvador prezıdentteri, Qatar Ámiri, Bosnıa jáne Gersegovına, Grekıa, Mońǵolıa jáne Pákistan premer-mınıstrleri, Kambodja Koroli, Saýd Arabıasynyń taq murageri, Abý-Dabıdiń taq murageri, Monakonyń hanzadasy, Lúksembýrgtyń Uly gersogy, Taılandtyń hanshaıymy, BUU Bas hatshysy, Halyqaralyq Olımpıada komıtetiniń Prezıdenti, Dúnıejúzilik densaýlyq saqtaý uıymynyń Bas dırektory, Shanhaı yntymaqtyq uıymynyń Bas hatshysy jáne basqa da birqatar sheteldik resmı tulǵa qatysty.
Olımpıadaǵa qatysýshy memleketter sportshylarynyń saltanatty sherýinde Qazaqstannyń Memlekettik týyn short-trekshi Abzal Ájiǵalıev pen kónkımen syrǵanaýshy Ekaterına Aıdova alyp ótti. Qazaqstannyń ulttyq qurama komandasyna Qasym-Jomart Toqaev qol bulǵap, qoldaý kórsetti.
Qysqy Olımpıadada 87 joldama utyp alǵan ulttyq qurama sapyndaǵy 34 sportshy júldege talasady. Olar shańǵy, frıstaıl, taý shańǵysy, tramplınnen shańǵymen sekirý, shańǵy qossaıysy, bıatlon, kónkımen júgirý jáne short-trek sıaqty sporttyń segiz túri boıynsha saıysqa túsedi.
16 kúnge sozylatyn Olımpıada oıyndarynda sporttyń 15 túrinen 109 medal sarapqa salynady.